Miehtá biddjot háldogiddagassii

Politiijat eai leat dattetge vel beassan dutkat áššáskuhtton dievddu odne, muhto su bealušteaddji dadjá 59-jahkásačča miehtat biddjot háldogiddagassii.

 – Mun lean hállan iežan klieanttain, gii veallá Davvi-Norgga universitehtabuohcciviesus Romssas, ja son miehtá biddjot háldogiddagassii, dadjá advokáhtta Stein Rønning NRK:i.

Gottii eamida ja bárdnebeali

Almmái lea áššáskuhtton goddán iežas eamida Pimsiri Songngam (37) ja su 12-jahkásaš bártni Petchngam Songngam.

Eadni ja bárdni báhččuiga bearraša ruovttus Girkonjárggas borgemánu 30. beaivvi čuovganeapmái.

Politiijat jáhkket dievddu geahččalan iežas sorbmet maŋŋel goddima, čállá iFinnmark. Áššáskuhtton dievdu roasmmohuvai garrasit, ja leamaš buohcciviesus dan rájes.

Mearridit odne

Politiijat gáibidit áššáskuhtton dievddu njealji vahkkui háldogiddagassii, sii dáhttot maid vákšut dievddu gulahallama earáiguin guokte vahkku.

Davvi-Romssa diggegoddi meannuda ášši odne. Politiijat galge odne dutkat dievddu, muhto dutkan maŋiduvvo go almmái lea ain garrasit hávváduvvon. Albmá advokáhtta lea gulahallan suinna.

 – In dáhto muitalit maid mu klieanta lea muitalan dáhpáhusas ovdal go gažaldat háldogiddagasa birra lea čielgan, dadjá Rønning.