Porsáŋggu gielda doarju ođđa válgalága ahte vuolidit jienastanahkemeari 16- ja 17-jahkásaččaide vai nuorat besset jienastit 2023 gieldda- ja fylkkadiggeválggain.
Miessemánu 27. beaivvi 2020:s evttohii Norgga válgalávdegoddi ođđa válgalága, NAČ 2020:6 Friija ja čiegus válggat. Erenoamážit lea válgalávdegoddi digaštallan vuđolaččat, berre go jienastanahkemearri rievdaduvvot. Lávdegotti eanetlohku háliida vuolidit jienastanahkemeari vai 16–17- jahkásaččat besset jienastit gieldda- ja fylkkadiggeválggain. Evttohus lea sáddejuvvon gulaskuddamii ja áigemearri lea juovlamánu 30. beaivi 2020.
Lei Porsáŋggu Bargiidbellodaga gielddastivraáirras Agnete Masternes Hanssen, gii evttohi loktet dán ášši jagi maŋimuš gieldastivračoahkkimii, vai gielddastivra beassá cealkit ovdal áigemeari mii lea Porsáŋggu gieldda oaivil.
Su evttohus lei: Porsáŋgu gielda háliida vuolidit jienastanahkemeari gieldda- fylkkadiggeválggain 18 jagis nu ahte 16–17-jahkásaččat sáhttet jienastit gieldda ja- ja fylkkagielddaválggas 2023:s.
Duorastaga gielddastivra jienastii ahte sii leat mielas loktet ášši gielddastivrii dan beaivvi. Nubbi jienasteapmi lei geat dorjo válgaevttohusa. 14 gielddastivraáirasa dorjo ođđa válgaevttohusa ja njealjis ledje vuostá. Ovddádusbellodaga Thorbjørn Pettersen čilgii sii jienastit nu mo Guovddášbellodat jienasta, nu ahte sii eai doarjjo válgaevttohusa.
