35-jahkásaš mieđihii giddagassii njealji vahkkui Donjevuona goddináššis. 32-jahkásaš ii loga iežas ipmirdit manne son sivahallo leamaš mielde daguin.
Mánnodaga dollui giddagasčoahkkin mas dat guokte Islándalačča leaba áššáiduhtton go galgaba goddán 40-jahkásaš Gisli Thor Thorarinsson lávvordaga čuovganeapmái.
35-jahkásaš dievdu ii lean disdaga vel cealkán lea go son sivalaš goddimii, dan sivas go ii lean dulka sajis.
Gaskavahkku galgá čađahuvvon gažadeapmi politiijain.
Ii mieđit áššis dahkamuššan
35-jahkásaš, gean navdet čađahan goddima, lea biddjon rájusgiddagassii njealji vahkkui reivvestallan- ja guossástallangildosiin.
Nubbi dievdu lea biddjon vahkku rájusgiddagassii reivvestallan- ja guossástallangildosiin.
– Giddagasmearrádus lea váidon, čilge nuppi dievddu bealušteaddji Jens Bernhard Herstad NTB:i.
Son oaivvilda ahte sus ii lean makkár ge dahkamuš goddimii.
Dáhpáhus lávvordaga
Islándda mediat čállet ahte 40-jahkásaš gottáhallan dievdu ja 35-jahkásaš, gii lea áššáiduhtton, leaba vieljažagat.
Politiijat ožžo dieđu ahte muhtin dievdu lei báhččon Donjevuonas lávvordaga čuovganeapmái diibmu 05.30.
Heahteveahkit geahččaledje gádjut báhččon dievddu heakka, muhto eai lihkostuvvan dainna ja dievdu jámii.
(©NTB)
