Sosialistálaš Gurutbellodat ohcala mieđihanlága, ja dieđihit ahte leat massán gierdevašvuođa.
Golbma jagi lea gollan dan rájes go ráđđehus Hurdal-vuogádagas čálii ahte áigu ovddidit mieđihanlága, ii leat mihkkege vuos dáhpáhuvvan.
Sosialistálaš Gurutbellodat (SG) lea massán gierdevašvuođa, ja áitet ge ovddidit láhkaevttohusa ieža, čállá Klassekampen.
Hurdal-vuođđovuogádat 2021:s čuožžu ahte ráđđehus áigu rievdadit ráŋggáštuslága nu ahte sátnehámis galgá čielgasit boahtit ovdan ahte seksuála lagasvuohta mieđiheami haga lea gildojuvvon ja definerejuvvo veagalváldimin. Láhka dávjá gohčoduvvo mieđihanláhkan.
Muhto golmma jagi maŋŋá ii leat mihkkege dáhpáhuvvan, ja SG vuorjašuvvá dainna.
– Dál lea áigi dievvagoahtán oažžut sadjái mieđihanlága. Dat čuožžu Hurdal-vuođđovuogádagas, ja lea vuoitu man ovddas nissonlihkadus guhká lea bargan, sadjá SG justiisapolitihkalaš ságadoalli, Andreas Sjalg Unneland.
Unneland oaivvilda ahte son ii ádde manne ii leat vel ge boahtán makkárge láhkaevttohus ráđđehusas, ja lohká ahte orru leamen nu ahte justiisaministaris ii leat láhkaevttohus vuoruhanlisttus.
Klassekampen ii leat lihkostuvvan oažžut oktavuođa justiisaministariin Emilie Engler Mehliin (Gb).
(©NTB)
