Sápmi govvaráiddu sárgu Runar Balto mieđiha áđđestallan eará sárgosa, muhto ii oaivvil dan plagiáhttan.
Sápmi govvaráiddu sárgu Runar Balto mieđiha áđđestallan eará sárgosa, muhto ii oaivvil dan plagiáhttan.
Sápmi govvaráiddu sárgu Runar Balto, guhte čuoččuhuvvui plagieren ovtta olgoriikkalaš sárgu, ii leat ieš ovttaoaivilis dasa.
– Dat maid mun lean dahkan lea ođđasit tevdnet gova man gávdnen interneahtas, inge leat bidjan dasa iežan vuolláičállaga. In leat jurddašan ahte dat galgá mu vuoiŋŋaduodji, lohká son.
– Lei galgat nama
Balto goitge mieđiha ahte son lei galgat čállit govvii ahte lea friddja sárgojuvvon eará gova mielde.
– Dan ferten šállošit go in bidjan rievttes sárgu nama fárrui, muhto justa dien gova leat hui oallugat ođđasit sárgon ja lei váttis gávdnat gii álgogova lea sárgon. Álggos, go munnje čalmmustahttui dát ášši, de gullen ahte sárgu lei ruošša, ja de ges belgialaš, ja de fránskalaš ja loahpas gullen ahte lei kanadalaš gii lea álgoálggus sárgon dan gova, lohká son.
Ii bala dubmehallamis
Balto ii jáhke áššis šaddat mihkkege váikkuhusaid sutnje.
– Leat sii guđet čuoččuhit mu plagieren geain lea lea duođaštusnoađđi, ja mun gal in bala dubmehallamis dán áššis. Mun dieđán galgá oba ollu ovdal go satiirasárgu lea olggobealde sátnefriddjavuođu rájiid, lohká Balto.
Ii doallevaš dubmehallat
Oslo universitehta vuosttašamanueansa priváhtarievttis, Harald Irgens-Jensen, geas lea immateriálalaš-riekti fágasuorggis lohká jus bidjá guokte buktaga bálddalaga, ja jus dat vásihuvvojit leat dat seamma, de lea plagiáhtas sáhka.
– Plagiáhtta lea vuoigŋaduojilága rihkkun, ja dat lea rihkolaš. Muhto dán áššis lea dušše sáhka ovtta sárgumis sáhka, ja dan in oainne juridihkalaččat doallevažžan dubmehallat, lohká son.
Sáhku máksit
Irgens-Jensen lohká go Balto lea maŋŋil mieđihan ahte lea sárgon eará gova vuođul, de ii rievdat nu ollu.
– Ferte dieđusge geahččat man viidát lea leavvan, ja sullásaš áššiin lea gáibiduvvon ahte dat lobihis govat galget čohkkejuvvot ruovttoluotta ja billistuvvot. Maiddái geahččat man ollu ruhta lea jorran dán vuođul, ja nu movt dát ášši orru, de sáhttá Balto šaddat máksit buhtadusa vuoigŋadahkkái, moadde duhát ruvnno, lohká Irgens-Jensen.
– Eanet dovddus go doaivvui
Áidna váikkuhus man Runar Balto oaidná dán áššis lea ahte son ja su dáidda lea ožžon nuvttá márkanfievrrideami.
– Mun imaštalan go dát ášši lea ožžon nu stuora beroštumi, ja mun gal oainnán dan positiivan go Norgga Preassalihttu vuoruha návccaid bidjat dása. Orru nu ahte lean eanet dovddus Norggas go ieš ledjen doivon, ja dát ášši maiddái čalmmustahttá dan rievttes dáiddára, lohká son.
