– Midjiide mearkkaša boazu visot

Dál leat árktalaš olgoriikkaministarat čoahkkanan Iqaluitii, Kanadai. Doppe geigejuvvui EALLIN prošeavtta 120 siidosaš raporta ministariidda.

 – Midjiide mearkkaša boazu visot. Jus mii massit bohccuid, de mii massit giellamet, kultuvramet, árbedieđuideamet ja máhttuimet mo johttit luonddus, cealká muhtin EALLIN prošeavtta oasseváldi raporttas.

Vásihit hástalusaid

EALLIN nammasaš prošeavttas leat mielde boazodoallonuorat Ruoššas, Suomas, Ruoŧas ja Norggas. Njealji jagi badjel oasálaste badjel 160 álgoálbmoga nuora iešguđet guovlluin Ruoššas, Mongolias, Suomas, Ruoŧas ja Norggas EALLIN prošeavtta 12 servodatvuđot bargobajiin. Prošeavtta leat dorjon Norga, Ruošša ja Sámeráđđi. EALLIN prošeakta gáibida beroštumi duođalaš hástalusaide maid nuorra boazovázzit vásihit, nugo mentála dearvvašvuhtii, váilevaš heivvolaš oahpahussii ja váilevaš oasálastimii báikkálaš servodatovdánahttimis. Raporttas man ikte geigejedje olgoriikkaministariidda, lei prošeakta čoahkkáigeassu ja ávžžuhusat Árktalaš Ráđđái.

Nuorat boahtteáigi

 – Boazodoallonuorat leat boazodoalu boahtteáigi, ja garra diehtu berošteaddji nuoraid bealis, lei ahte sii háliidedje joatkit boazodoaluin dasgo dat lea “buorre eallin”, čállá prošeakta preassadieđáhusa bokte.

Dattege leat máŋga ášši ja hástalusa mat dahket ahte eallin «ii leat nu buorre» juohke guovllus gos boazodoallu gávdno. EALLIN prošeakta čohkkii nuorra táigaguovllu ja duottarguovllu boazovázziid oktii ovddidan dihte sin jienaid Árktalaš Ráđđái.

– Eat leat goassege ovdal vásihan dákkáriid

Preassadieđáhusas čállet ahte davvi sirkumpolára boazodoallonuorat leat ovddemuččas gozihit jođánis rievdamiid mat dáhpáhuvvet árktalaš guovlluin; danin, sin máhttu ja gelbbolašvuohta lea čoavdda sin boahtteáiggi eksistensii sin pastorála ruovttuguovlluin.

 – Min álbmogat vásihit dramáhtalaš ja historjjálaš rievdamiid min ruovttuguovlluin, rievdamiid maid mii eat goassige ovdal leat vásihan min davvi boazoálbmogiid duhátjagiid historjjás, dadjá Árktalaš Ráđi EALLIN prošeavtta jođiheaddji, Mikhail Pogodaev, Máilmmi Boazoálbmogiid Searvvi (WRH) jođiheaddji.

Gáibida ahte bargagohtet

 – Mii diehtit doarvái ollu rievdamiid birra vai sáhttit bargagoahtit daid ektui, dadjá Anders Oskal, EALLIN prošeavtta nubbijođiheaddji ja IPCC 5.raportta nubbin čálli ja joatká:

 – Mii eat dárbbaš eanet árvvoštallamiid vai ipmirdit, nappo mii fertet bargagoahtit eará láhkái dál jos min servodagat ja kultuvrrat galget birget ja ovdánahttot dan ovdáneamis mii dál dáhpáhuvvá árktalaš guovlluin. Ja bargagoahtit eará láhkái leage juste dan maid EALLIN raporta gáibida.

Rapportaid gávnnat eallin.org siiddus