-Almmuhus-
-Almmuhus-
OĐĐASAT Mia Aurora (14) beatnagiidda adde boasttu boahku

Mia Aurora (14) beatnagiidda adde boasttu boahku

-

-

Mia Aurora Alm (14) ii beasa gilvalit Finnmarksløpet junior-luohkás iežas beatnagiiguin go daidda adde boasttu boahku golbma beaivvi ovdal gilvvu. 

Beanavuodjinbiras mobiliserii go Mia Aurora Alm ja su veahka fuobmájedje duorastat iđida ahte beatnagat ledje ožžon boasttu boahku, ja mii dagahii ahte eai aŋkke beasa searvat gilvui. 

– Mun ožžon šohka. Mun han lean hárjehallan iežan beatnagiiguin jahkebeali juo, ja bidjan ollu áiggi ja ruđa sidjiide, muitala Mia Aurora Alm, gii galgá vuosttaš geardde searvat Finnmarksløpet gilvui.

Amas beatnagat

Álttá vuodjinbeatnagiid searvi ohcalii veahki eará beanavuddjiin veahkehan dihte Mia Aurora,  gii lea Røkland gilis Nordlánddas eret ja ii dovdda ovttage Álttás.

– Mii oaččuimet earáin luoikkas beatnagiid. Odne lean jurddašan geahččalit vuodjit ja oaidnit movt dat manná. Dat lea gelddolaš. In dovdda beatnagiid, ja de ferte oaidnit movt dat šaddá, dadjá Mia Aurora.

Máhccat iežas beatnagiiguin

Mia Aurora lea olles iežas eallima vuodján beatnagiiguin, muhto ii leat nu ollu vel gilvalan. Son oassálasttii Beaskáđđasa junior-luohkás maid, gos bođii nubbin. Dál ii dieđe movt Finnmarksløpet gilvvuin manná.

– Mun ferten dušše geahččalit, ja baicce máhccat gievrrabun ruovttoluotta iežan beatnagiiguin eará háve, muitala Mia Aurora.

Ii ovttage sivva

Ii áhčči ja veahkki Håvard loga sivahallat ovttage eará.

– Dat lea min iežamet sivva. Fertet oahppat dás, muhto lihkus ordnašuvai. Mii leat boahtán ná guhkás ja máksán buot. Go ordnašuvai, ja go Mia ieš áigu geahččalit, de gal dieđusge oažžu dan. Mun in gal livčče su bággen amas beatnagiiguin searvat jus ieš ii áiggoše, dadjá Håvard Alm.

Alm lea dorvvolaš ahte leat buorit beatnagat, go ledje hárjehallan 600 km luohkkái. Máŋga beanavuoddji hárjehallet eanet beatnagiiguin go dan maid atnet gilvvus, vai lea válljenmunni go galget gilvalit.

– Dieđusge ii leat seamma go iežas beatnagiiguin gilvalit, muhto son lea dušše álggus iežas beanavuodjinkarriearas. Dál lea dehálaš ahte son oažžu fiinna vásáhusa, muitala Alm.

- Advertisement -
-Almmuhus-