Meron AS fitnodat lea ožžon 300 000 ruvnno fanasoastimii nuorra guolásteaddjái.
Meron AS lea ođđa guolástusfitnodat Deanus gielddas man Ari Solbakk lea vuođđudan, ja oažžu 300 000 ruvdnosaš doarjaga bivdofatnasa oastimii, dieđiha Sámediggi preassadieđáhusas.
Fitnodat lea gieskat registrerejuvvon ja fatnasa oastin lea vuosttaš gearddi investeren. Fitnodat oaivvilda ahte mearraborramuša jearru lassána, ja sin doaibma lea eanaš riddobivdu.
Ari Solbakk lea 25 jagi boaris ja áigu bargat konvenšunála bivdduin Gobis Deanu gielddas. Son oaivvilda ahte fitnodat lea unni, muhto gánnáhahtti guolástusfitnodat.
Mielde sihkkarastit sámi ássama
Sámediggeráđđi Silje Karine Muotka (NSR) oaivvilda ahte lea buorre go Sámediggi sáhttá doarjut nuorra rávesolbmuid geat áigot áŋgiruššat stuorrát.
– Illudahttá sakka go rekrutteren guolástusaide lassána, ja earenoamážit illudahttá dat go nuorra olbmot áigot bargat guolástusain. Deaŧalaš lea ahte Sámediggi doarju sin geat háliidit bargat guolástusealáhusas. Dánlágan áŋgiruššan sáhttá addit maiddái eará oalgeváikkuhusaid, nu go ovdamearkka dihtii leat mielde sihkkarastimin sámi ássama rittuin, dadjá Muotka.
Lokten doarjaga čuođi duháhiin
Jahkásaš bušeahtaid bokte lea Sámediggi várren váikkuhangaskaomiid mariidnaealáhusaide. Doarjaga addima bokte fatnasiidda, báikkálaš vuostáiváldinrusttegiid ođasmahttimiin ja mariidna ealáhusdoaimma buvttaovddideapmái váikkuheami bokte, sáhttit nannoseappot váikkuhit ceavzilis guolástusbirrasiid bisuheami ja nannema sámi riddo- ja vuotnaguovlluin.
Sámediggi áigu eanet áŋgiruššat vuođđoealáhusaiguin dán jagi, ja lea lokten stuorámus doarjaga geavahuvvon fatnasiidda 200 000 ruvnnus 2019:s 300 000 ruvdnui 2020:s. Doarjja lea addojuvvon Doarjja vuođđoealáhusaide ortnegis.
