Vihtta ođđa Finnmárkomeastárat leat nammaduvvon skuvllaid fidnofágaid gilvvus.
Vihtta ođđa Finnmárkomeastárat leat nammaduvvon skuvllaid fidnofágaid gilvvus.
Mannan vahkku, njukčamánu 1. beaivvi rájes 3. beaivvi rádjái, lágiduvvojedje Finnmárkomeasttirgilvvut Girkonjárgga ja Hámmárfeasta joatkkaskuvllaid fidnofágain. Vuoitit nammaduvvojedje snihkkár-, revredivodan-, biiladivodan-, biilanjulgen- ja láhkken-, dearvvašvuođa-, elektrihkkár- ja sveisenfágain.
Vuosttaš háve
Girkonjárgga Joatkkaskuvla čállá preassadieđáhusas, ahte lea vuohččan go Finnmárkku skuvllat lágidit dákkár gilvvuid, ja vaikke lea áddjás bargu sajáiduhttit gilvovugiid, de aŋkke serve eanaš skuvllat fylkkas gilvvuide. Oktiibuot 41 oasseváldi ledje boahtán Girkonjárgii ja Hámmárfestii, ja badjel 30 oahpaheaddji Hámmárfeasttas, Álttás, Leavnnjas, Davvinjárggas, Guovdageainnus ja Girkonjárggas ledje duopmárin. Boahtte jagi geahččalit oažžut stuorát beroštumi gilvvuide.
11 oasseváldi galget leat
Guovvamánus ledje ge seammalágan gilvvut gohkken- ja vuoktačuohppanfágain. Maŋŋelaš dán mánus gilvalit duodje- ja mášinvuodjinfágain. Oktiibuot ožžot ge Finnmárkkus 11 joatkkaskuvlaoahppit vejolašvuođa beassat viidásat gilvalit iežaset fágasurggiid Norggameasttirgilvvuin.