-Almmuhus-
-Almmuhus-
OĐĐASATMeasta 50 cealkámuša boahtán Rástegáissá bieggamilloplánaide

Measta 50 cealkámuša boahtán Rástegáissá bieggamilloplánaide

-

-

NVE lea ožžon lagabui 50 gulaskuddancealkámuša ja das čájehuvvo ahte leat stuorra vuostehágut ­«Davvi» biegga­milloprošektii.

Fitnodat Grenselandet AS háliida hukset bieggamillopárkka maid sii leat gohčodan «Davvi», man leat plánen hukset davábeallái Rástegáissá, guvlui mii lea Davvesiidda ja Deanu gielddarájá alde.

Grenselandet AS pláne ohcat bieggamillopárkahuksema ja doaibmakonsešuvnna Davvesiidda ja Deanu duottarguovlluin.

Prošeakta lea ain álggahanmuttus, ja okta lávki lea gulahallan ja diehtojuohkin. Gulaskuddanáigemearri lei juovlamánu 31. beaivvi ja dál lea gulaskuddanáigi loahppan ja NVE seniorinšenevra ja gulaskuddanolmmoš Mathilde Berg muitala leat boahtán olu gulaskuddancealkámušat áššis.

– Dál mii geahččat buot gulaskuddancealkámušaid mat leat boahtán sisa ja dat leat hui máŋga cealkámuša. Mun lean dál lohkan ahte leat lagabui 50 cealkámuša boahtán, lohká NVE seniorinšenevra ja gulaskuddanolmmoš Mathilde Berg.

 

Geahčadit maid ferte guorahallat

Davvi bieggamilloprošeakta

Bieggamilloprošeakta «Davvi» lea ­plánen cegget gaskal 100 ja 267 ­bieggaturbiinna, juohke turbiidna lea gaskal 175 mehtera dahje 195 ­mehtera allat, areála sturrodat lea 78 njealjádaskilomehtera. 

 

Bieggamillopárka šattašii nubbin stuorámus olles Norggas, ja galgá doaibmat Siskkit Čorgaša ja Lágesduoddara orohagaid siste.

Iešguđetge searvvit, gielddat, ásahusat ja maiddái priváhta olbmot leat sádden cealkámuša bieggamillopárka prošektii.

– Mii geahččat buot cealkámušaid ja geahččat maid iešguđetge bealit gáibidit ja dáhttot guorahallat. Mii de ráhkadit ovtta guorahallanprográmma Grenselandet AS:i, gos sii ožžot čilgejuvvot maid sii fertejit guorahallat váikkuhusguorahallamis, dadjá Berg.

 

Negatiiva cealkámušat

Mannan čavčča lágiduvvo álbmotčoahkkimat sihke Gussanjárggas ja Sirpmás.

Sirpmás lágiduvvui álbmotčoahkkin guktii, go vuosttaš háve čoahkkin lágiduvvui ii lean dulka sajis.

Álbmotčoahkkimiin bođii ovdan stuorra vuosteháhku ja nu čájehuvvo maiddái gulaskuddancealká­mušain.

– Leat boahtán olu negatiiva cealkámušat. Min bargu dál lea addit ovtta guorahallanprográmma, muhto mii dieđusge registreret ahte leat vuostehágut dán áššis, lohká Mathilde Berg.

 

Ohcamuša ja váikkuhusguorahallan

Son ii jáhke Grenselandet AS geargá sáddet konsešuvnnaohcamuša NVE:i ovdal 2019:s, jus fitnodat váldá prošeavtta viidáseappot.

– Njuolggadusaid bokte galgá Grenselandet oažžut guorahallanprográmma ja dalle fertet mii ráhkadit dan sidjiide. Jus Grenselandet háliida joatkit viidáseappot dainna prošeavttain, ja ohcá konsešuvnna, de čađahit mii ođđa gulaskuddanáiggi ohcamušas ja váikkuhusguorahallamis, loahpaha son.

-Almmuhus-