Norrbottena regiovdna dieđiha ahte measta 100 ođđa njoammuma leat duođaštuvvon Davvi-Ruoŧas maŋemus jándora. Eanemus njoammu dávda Lulejus, Haparandas ja Bihtámis. Olbmot geat dárbbašit divššu lassánit maid.
Norrbottena regiovnna njoammuneastadandoavttir Anders Nystedt čilge preassadieđáhusas ahte lea váttis guorrat njoammuma.
– Mii oaidnit lassáneami positiiva iskkusbohtosiin ja dat mearkkaša ahte korona njoammu Norrbottena servodagas. Eanemus olbmot eai dieđe movt sidjiide lea njommon dávda, ja dat ii leat buorre mearka. Korona lassána dál, ja mun lean surolaš go hede álget olbmot gávppašit go lea «Black Friday» ja juovlaskeaŋkkaid, čilge Nystedt.
Norrbottena regiovnna njoammuneastadandoavttir Anders Nystedt dadjá maid ahte sáhttet boahtit báikkálaš ráddjehusat gávppiide.
Regiovdna dieđiha maid ahte oktanuppelohkái olbmo leat divššus leana buohcceviesus ja golmmas sis leat intensiivadivššus. Oktiibuot 2558 olbmos lea dieđihuvvon koronadávda Norrbottena leanas giđa rájes.
