Maŋemus vahkus leat measta 100 ođđa njoammuma dieđihuvvon Davvi-Ruoŧas. Dal váruha Norrbottena leana njoammuneastadandoavttir Anders Nystedt ahte njoammun sáhttá vel lassánit.
Njoammun sáhttá vel lassánit Davvi-Ruoŧas, nu váruha Norrbottena leana njoammuneastadandoavttir Anders Nystedt preassadieđáhusa bakte.
Maŋemus vahkuid lea koronadávda njommon measta čuođi olbmui Norrbottenis. Eanemus njoammu dávda Lulejus, Bodenis, Jielleváris ja Bihtámis. Njeallje olbmo leat maid buohcceviesus Norrbottenis koronadávdda dihte, ja guovttis leaba intensiivadivššus buohcceviesus, dieđiha Regiovdna Norrbotten.
– Mii oaidnit eanemus njoammumiid Luleju gávpogis, muhto dat hal ii leat imaš go doppe ásset eanemus olbmot, čilge son. Muhto mun ávžžuhan olbmuid leat várrogasat ja doallat gaskkaid. Mii oaidnit olbmot eai čuovo min rávvagiid seamma bures go ovdal, cealká Davvi-Ruoŧa njoammuneastadandoavttir Anders Nystedt.
Lulejus lea 51 olbmos dieđihuvvon koronadávda maŋemus vahku. Bihtámis 15, Bodenis fas 11 ja Jielleváris 13.
Norrbottena leana njoammuneastadandoavttir Nystedt ávžžuha maid olbmuid garvit kollektiivajohtolaga jus lea vejolaš, go doppe ii leat álki doallat gaskkaid. Koronadávda njoammu maid bargosajiin, ja dál leat olu ruvkebargit fas boahtán Jiellevárrái bargat.
– Dál leat olu liige bargit boahtán fas Jiellevárrái bargat. Mii diehtit giđđat lei olu njoammun doppe, muhto sávan dál ahte olbmot dollet gaskkaid gávppiin ja servodagas vai njoammun ii fas lassán.
