Vuosttaš geardde jienasteaddji, Joar Sten Olav Sargon Hætta válddii buori áiggi humadit poltihkkariiguin ovdal go mearridii ja vázzilii jienastanbáikái jienastit.
Vuosttaš geardde jienasteaddji, Joar Sten Olav Sargon Hætta válddii buori áiggi humadit poltihkkariiguin ovdal go mearridii ja vázzilii jienastanbáikái jienastit.
Joar Sten Olav Sargon Hætta devddii 18 jagi dán jagi mii mielddisbuvttii ahte son beassá odne vuosttáš háve jienastit stuoradigge- ja sámediggeválggain.
Váldán áiggi humadit politihkkáriiguin
Hætta ii loga iežas válljen gean jienasta ovdagihtii, muhto son válddii báicce áiggi politihkkariid ságain finadit ja jearahallat sin ovdal go váldii mearrádusa.
– In lean ovdagihtii válljen gean jienastan, ledjen dás olggobealde dain tealttain gulaskuddame makkár váibmoáššit sis leat. Dan vuođul válljejin maid jienastin, muitala Hætta dakka maŋŋel go lei luoitilan válgalihppu.
– Stuora illu
Joar lea vuordán dan beaivvi, maid son lohká illubeaivin.
– Lei suohtas maid dalle guokte jagi áigi go beasaimet suohkanstivrraválggain jienastit, dalle lei dakkar geahččalanprošeakta. Dal bessen duođai jienastit stuoradiggeválggain, lean vuordán guhká dan beaivvi ja dat lea hui stuora illubeaivi munnje, lohká son.
Skuvlaválga váikkuhan
Joar Sten Olav muitala mii lea váikkuhan geasa son attii iežas jiena odne.
– Eanas leat dat áššit mat dagahedje gean mun jienastin, muhto maiddái sáhttá listtu veahá váikkuhit jus doppe leat olbmot geaid don dovddat. Maiddái lea válgagižžu, digáštallan ja skuvlaválga váikkuhan makkár bellodaga mun jienastin, loahpaha son.
Áigot maid jienastit
Son muitala ahte oallugat su agis meinejit dán jagi jienastit válggain.
– Juo, oallugat mu agis beroštit politihkas ja áigot maid dán jagi jienastit, loahpaha son.
