-Almmuhus-
-Almmuhus-
VALÁŠTALLANMearrideaddji gilvu Golleheargegilvui

Mearrideaddji gilvu Golleheargegilvui

-

-

Dán váhkkoloahpa galgá čielgat geat besset dan vuosttaš Golleheargegilvui searvat.

Golbma Norgga cupa heargegilvvu leat čađahuvvon dán rádjai.

Dán váhkkoloahpa lea njealját ja maŋemus gilvu.

Ovcci buoremusa čuoggáid mielde besset dan vuosttaš Golleheargegilvui mii lágiduvvo boahtte váhkkoloahpa Guovdageainnus.

Golleheargegilvu lea ođđa gilvvohallanmálle Norggabeale sámis.

Namalassii vuosttaš beaivvi ruhttet hearggit 1000 mehter joavkogilvvu mas váldo áigi.

Nuppe beaivvi lea fas 2000 mehter gilvu Suohpatjávrri alde. Gos hearggit ruhttet okta ja okta, ja gos dat heargi mas buoremus áigi lea ruohttá maŋemussan.

 

Mearrideaddjigilvu

Guokte beaivvi galget heargevuoddjit gilvalit dán váhkkoloahpa.

Dušše King Klæbo lea sihkkarasten alcces saji Golleheargegilvui, go lea čoaggán 50 čuoggá vuosttaš golmmá Norgga Cupa gilvvus.

Nils Jøran Eira heargi, Oreo, lea nuppi sajis 44 čuoggáin. Dat sáhttá teorehtalaččat ain jovssahallat ja šaddat olggobeallai dan ovcci buoremusa jus ii váldde čuoggá dán váhkkoloahpa.

Mikkel Andreas Eira heargi, Jovain, lea 10. sajis. Dat vuittii maŋemus gilvvu, ja lea dušše 3 čuoggá maŋábeale ovccát saji, gos lea Mikkel Jonas Eira heargi, Tesla. 

 

Sihkaraste goalmmát sajiin

Diimmá oktasaš heargecupa vuoittii, Ana Maria Eira heargi, Suiva, lea ruohttan hejot dán dálvvi.

Earret go dan vuosttaš Norgga cupa gilvvu maid vuittii.

Suivas leat seamma olu čuoggát go Teslas, muhto leat eanet buoret sajiid ja danin lea ovddabeale.

Suiva sáhttá ravgat olggos jus ii váldde čuoggáid.

Juste man olu čuoggáid dárbbaha vuolgá das movt hearggi maŋábeale ruhttet Suivá ektui. Jus goalmmát saji váldá dán váhkkoloahpa gilvvuin, namalassii 16 čuoggá, de lea sihkkarasten saji Golleheargegilvui.

-Almmuhus-