-Almmuhus-
OĐĐASATMearridan Guovddáš­bellodagain ovttas­bargat 

Mearridan Guovddáš­bellodagain ovttas­bargat 

-

-

Deanus ii leat vel čielgan gii šaddá sátnejođiheaddjin, go bellodagat leat ain šiehtadallamin.

Dál leat moadde vahkku vássán dan rájes go gielddaválga čađahuvvui, ja Deanus leat bellodagat ain šiehtadallamin. Deanu Sámelistu lea nu gohčoduvvon «joker», muhto dál lea listtu stivra mearridan ahte sii háliidit cegget eanetlogu Guovddášbellodagain. 

– Mis lea positiiva gulahallan Guovddášbellodagain. Mus lea buorre dovdu. Mearrádus lea ahte mii cegget eanetlogu Guovddášbellodaga joavkkuin ja dalle lea Jon Erland Balto sátnejođiheaddji, lohká Sámelisttu njunuš Odd Erik Solbakken. 

Hástalus Bargiidbellodagain ovttasbargat

Sámelistu lea maid gulahallan Deanu Bargiidbellodagain, muhto Solbakk lohká hástalussan boahtit ovttaoaivilii. 

– Leat golbma ášši mat leat hui hástaleaddjit, áššit mat midjiide leat dehálaččat, lohká Solbakk.

Son čujuha ahte sámegiella lea okta, Elkem lea nubbi ja goalmmáš ášši leat Vuonjalráššii bieggamillot. 

Boddu

Odd Erik Solbakk deattuha ahte ii leat mihkkige  čielggas vel, go dál lea veahá boddu šiehtadallamiin.

Boahtte vahkku loahpageahčen galget fas gulahallat. 

Positiiva

Guovddášbellodaga Jon Erland Balto lohká mannat ovddos guvlui šiehtadallamiin ja lea buorre doaivva boahtit ovttaoaivilii Sámelisttuin, Olgešbellodagain, Ovddádusbellodagain ja Gurutbellodagain. 

– Mis lea positiiva vuoigŋa. Dán rádjái lea mannan bures gulahallamiin, muhto mis leat ain guokte vahkku šiehtadallat ja gulahallat, dadjá Jon Erland Balto.

Son muitala ahte sii leat dál geahččan juohke bellodaga prográmma ja geahččalan heivehit politihkalaš áigumušaid oktii. 

Guovddášbellodaga sátnejođiheaddjeevttohas Jon Erland Balto. Vuorkágovva: Inga Marie Guttorm
Guovddášbellodaga sátnejođiheaddjeevttohas Jon Erland Balto. Vuorkágovva: Inga Marie Guttorm

Heaittihan gulahallama Sámelisttuin

Deanu Bargiidbellodaga sátnejođiheaddjeevttohas Helga Pedersen lohká bearjadaga eahket ožžon SMS-dieđu Sámelisttus, mas diehtu lei ahte sii leat sirdán Guovddášbellodahkii. 

– Mii eat dieđe siva, eat ge leat ožžon čilgehusa. Mun dovddan mis leat leamašan guokte buori čoahkkima Sámelisttuin, ja leat vuđolaččat mannan čađa sin gáibádusaid. Mii leat ovddidan evttohusaid, muhto eat leat gullan šat sis. Mis ii leat šat gulahallan Sámelisttuin, dadjá Helga Pedersen.

Son muitala iežaset váldán oktavuođa Guovddášbellodagain, iskat lea go vuođđu cegget eanetlogu. 

– Dál lea hui rabas gii šaddá Deanu sátnejođiheaddjin. In leat vel vuollánan, ii olmmoš galgga vuollánit ovdal go uksa lea gitta, lohká Helga Pedersen.  Šaddá go Helga Pedersen vai Jon Erland Balto sátnejođieheaddjin ii leat vel čielggas.

Bargiidbellodaga  sátnejođiheaddjeevttohas Helga Pedersen ii leat vel vuollánan. Vuorkágovva: Inga Marie Guttorm
Bargiidbellodaga  sátnejođiheaddjeevttohas Helga Pedersen ii leat vel vuollánan. Vuorkágovva: Inga Marie Guttorm
-Almmuhus-