-Almmuhus-
-Almmuhus-
-Almmuhus-
OĐĐASATMearridan goas ođđa klinihkat rahppojit Álttás ja Kárášjogas

Mearridan goas ođđa klinihkat rahppojit Álttás ja Kárášjogas

-

-

Juovlamánu 11.beaivi rahppo Álttá Klinihkka almmolaččat, ja beannot mánu maŋŋelaš rahppo Sámi Klinihkka, dieđiha Finnmárkku buohcceviessu.

Finnmárkkubuohcciviessu čađahišgoahtá dan stuorámus barggu spesialistadearvvašvuođabálvalusas mii goassege lea dahkkon Finnmárkkus.

Álttá Klinihkka lea mannan plánaid mielde, ja galgá váldot atnui čakčadálvvi.

 

Geahččaladdet rusttegiid ovdal rahpama

Maiddái dearvvašvuođaministtar searvá rahpanseremoniijai, ja dáhton lea mearriduvvon. 

– Mii leat guhká vuordán dan, ja leat hui ilus go dearvvašvuođaministtar Bent Høie áigu leat mielde rahpanseremoniijas, lohká Finnmárkku buohcciviesu hálddašeaddji direktevra Eva Håheim Pedersen.

Klinihkka lea vuos geahččalanáigodagas go geahččalit rusttegiid, vistti ja teknihkalaš vuogádaga.

Aiddobáliid leat MR-mašiinna geahččaladdan, ja ambulánsavuoddjit fárrejedje ođđamállet lanjaide mii lea klinihkkavistái gullevaš.

– Mii jáhkkit ahte Álttá guovllu ássit ožžot positiivvalaš vásáhusa Álttá Klinihkas, go lea beassan albmaládje johtui, lohká buohcciviessodirektevra.

Álttá Klinihkka fállá viiddis fálaldaga mas leat dábálaš govven, CT ja MR, lassin poliklinihka bálvalusaid.

Bissovaš johttispesialisttat galget maid čađahit soames čuohpademiid klinihkas, ja mihttu lea 23 000 pasieantta dálkkodit 2020:s.

 

Sámi bálvalusaid lokten

Mánu maŋŋel lea ođđa, stuora lávki Finnmárkku spesialistadearvvašvuođafálaldagas.

Ođđajagemánu 28. beaivvi rahppo klinihkka, ja stáhtaráđđi Bent Høie searvá doaluide.

– Mii leat hui ilus dan ovddas. Mii illudit, go Sámi Klinihkka lea stuora lávki sámi spesialistadearvvašvuođabálvalusaid hárrái, go somáhtalaš bálvalusaid ja psyhkalaš dearvvašvuohta, ja gárrendikšu leat organiserejuvvon seamma klinihkkii, sierra klinihkkahoavddain, lohká Eva Håheim Pedersen.

 

-Almmuhus-