Stáhta kártadoaimmahat lea mearridan čállinvuogi badjel 40 báikenammii Gáivuonas, ja suohkana bealis leat mearridan čállinvuogi Stuorajalga gilinammii.
Stáhta kártadoaimmahat lea Dálusvákki guovllus mearridan 42 báikenama čállinvuogi, dieđiha Gáivuona suohkan. Suohkana bealis ges leat mearridan čállinvuogi dárogillii, davvisámegillii ja kvenagillii Stuorajalga gilinamas.
Báikenammalága § 12 vuođul lea báikkálaš organisašuvnnain main lea gullevašvuohta mearriduvvon namaide vuoigatvuohta váidit mearrádusa. Almmolaš ásahusain ja doaimmain, mat gártet geavahit namaid doaimmaineaset, lea maiddái váidinvuoigatvuohta. Lea vejolaš váidit dušše čállinvuohkemearrádusa. Sis geas lea váidinriekti lea maiddái riekti oaidnit áššebáhpáriid. Vejolaš lea ohcat maŋidit bidjat nama fápmui dássážii go váidináigi lea nohkan dahje váidagat leat gieđahallojuvvon.
Mearriduvvon čállinvugiid gávnnat Gáivuona suohkana neahttasiidduin.
Gilinama vuođuštuvvon váidagat sáddejuvvojit Gáivuona suohkanii ovdal 15.05.2023.
