Dáinna luđiin mii ii leat gávdnamis vuorkkáin háliida juoigi addit mearrasámiide oasáža sin earenoamáš kulturártnas.
Rieban studio lea aiddobáliid almmuhan singela mas Åsa Márgget Anti juoigá «Bá’leagi Elle Risten/Kristine fra Rastaby»
– Dát luohti ii leat fidnemis arkiivvain ii ge nuohttagirjjiin. Dat lea earenoamáš mearrasámi kulturárdna, maid juoigi háliida addit ruovttuluotta mearrasámiide ja bearrašii. Elle Risten lei mánáhis olmmoš, muhto sus leat olu fuolkkit. Okta sis njuorrasii go muhtun jagiid dassái gulai Åsa Márggeha juoigame luođi Hámmerfeasttas Sámi álbmotbeaivvi doaluin, muitala Rieban Studio Bernt Mikkel Haglund preassadieđáhusas. Lea ge Haglund gii lea ráhkadan musihka luohtái.
Dán dáhpáhusa maŋŋel ipmirdii juoigi man dehálaš oassi luođit leat mearrasámiid identitehtas, ja maid oinnii ahte ferte addit sidjiide ruovttoluotta. Mearrasámit leat massán sin sámi kultuvrra ja giela dáruiduhttima geažil. Nu álggii bargu gárvvistit luohte-cd masa leat čohkkejuvvon mearrasámi luođit.
Åsa Márgget Anti vuosttaš olles álbuma «Sievjju verddežat» almmuhuvvo guovvamánu dán jagi.
