Urbánis merkojuvvo, makkáraš geassi šaddá. Jos Urbánis leat čoaskimat, de šaddá liegga geassi, ja jos lea liekkas, de šaddá čoaska geassi.
Daddjo maid, ahte jos Urbánis ii bivaldišgoađe, de čoaskimat bistet geassemánu gaskkamuddui. Muhtun guovlluin dadjet Urbán dálkkiid bistit gitta Bárdebeaivái (24.8.).
Dajahussan lea maid: Urbán alla dulvvit. Dat mearkkaša, ahte dalle leat jávrriin ja jogain alimus dulvvit ja dalle maid maŋimuš skálvvit suddet, ain jo ordaravdii.
Urbánis rahpasišgohtet lastamuorain čuolmmat. Urbánbeaivvi rádjái lea boahtán Sápmái maŋimušge bárbmoloddi.
