Odne álget suv´ijat. Dat lei diiddaid mielde dehálaš beaivi eliide ja beaivái leat maid čadnon dálkeeinnosteamit.
Suv‘ijat lea cuoŋománu 15.-17.beivviid. Suv‘ijat leat golbma ija cuoŋománu gaskkamuttus – 15., 16. ja 17. beaivvei čuovganeapmái.
Elliide lea vuosttaš suv‘idja deaŧalaš beaivi. Dalle guolit vuodjalit ja vuoražas manne vuosttaš mani.
Boares diida dadjá ahte juos suv‘ijaid cuoŋuda, de šaddá guhkes garra giđđa. Galbma dálkkit bistet 27 jándora dahje goittotge Irjánbeaivái (23.4.). Juos ii cuoŋut, de šaddá muhtun muddui buorre giđđa.
Juos beaivvi ovdal vuosttaš suv‘ija suvvolastá (lea muođđa), de šaddá báhkka geassi.
Máttasámit lohke ahte suv´ija galmmas bisuhii čoaskásiid.
Deatnogátte olbmot dadje fas ahte juohke galbma suv´idja bisuhii čoaskásiid ovcci beaivvi. Nuba daddjui ge ahte jus buot golbma suv´ija lei galmmas, de čoaskásat biste «golbm´-ovcci». Dat mearkkašii ahte čoaskasat biste golmma geardde ovcci beaivvi.
Dološ olbmot juhke jagi guovtti oassái; dálve- ja geasseáigái. Cuoŋománu 14. beaivi gohčoduvvui geassebeaivin. Dalle álggii geasseáigi, mii bisttii 26 vahku, namalassii golggotmánu 14. beaivái. Geasseáiggi gaskkamuddu lei Jágát (25.7.) ja dálveáiggi fas Heaikkabeaivi (19.1.).
Gáldu: Heikkiarmas Lukkari, Sámi Áigi 16.04.1982.
