Njukčamánu 25. beaivi lea Márjjábeaivi. Beaivái leat čadnon dálkediiddat mat geažuhit mot giđđa ja geassi šaddet.
Márjjábeaivve dološ olbmot gehčče, makkár giđđadálkkit ja geassi leat boahtimin.
Jos ovdal Márjjábeaivvi bivaldii, de bođii garra giđđa.
Muhto jos garradálkkit biste gitta boares Márjjábeaivái (7.4.), de giđas ja geasis šattai buorre.
Deatnogátte olbmot oidne Márjjábeaivvis, makkár luossageassi lea boahtimin. Jus Márjjábeaivve muhtii, dalle lei vissis, ahte Deanus lea luossa valjis.
Daddjojuvvui, ahte Márjjábeaivve beaivváš báitá soahkegierragis nubbái. Dat mearkkašii, ahte beaivi ja idja lea seamma guhkki.
Vuosttaš lottit bohtet Márjjábeaivve bárpmus, njukča girdá Sápmái állat sealggis.
Anáraččat fárredišgohte Márjjábeaivvi oktasaš dálveorohagain iešguhtege geassebáikásis. Deatnogátte olbmot vulge mearrabivdui, ja oarjánat johttájedje davás.
Muohtajagiid goddebivdu álggahuvvui Márjjábeaivve, dalle namalassii gottit gorgŋo duoddariidda. Bivdu bisttii mánotbaji.
Kristtalaš máilmmis Márjjábeaivi lea muitobassi Mariai, geasa eŋgel Gabriel almmustuvai ja almmuhii Jesus-máná riegádeamis. Márjjábeaivi han lea ovcci mánu ovdal juovllaid.
