Ollu festiválamannit duddjojit Márkomennui, ja doppe ledje oaidnimis ollu fiinna čiŋat. Sámis, nu go muđui maid máilmmis, leat rievddadan čiŋat ja motat. Márkomeannus sáhtii ge oaidnit ahte dál lea lieđđehearvvat gákti bivnnut.
Ollu festiválamannit duddjojit Márkomennui, ja doppe ledje oaidnimis ollu fiinna čiŋat. Sámis, nu go muđui maid máilmmis, leat rievddadan čiŋat ja motat. Márkomeannus sáhtii ge oaidnit ahte dál lea lieđđehearvvat gákti bivnnut.
Márkomeannu lea báiki gos beassá oaidnit váikko man olu dujiid ja čiŋaid.
Olbmot duddjojit ođđa čiŋaid juste dan festivála váste.
Girjjatgákti lea guhka leamaš jávkosis, muhto maŋemuš áiggiid leat álgán fas ihttit girjjatgávttit, ja muđui lieđđegáktediŋggas gorrojuvvon gávttit.
Dál lei goit Márkomeannus juohke nuppi gávttehasas lieđđegákti alde. Soapmásiin lea liidni, earáin ii leat.
Muhtimiin leat bieksut, earáin fas áibbas dábálaš skuovat.
Vuolimusas oainnát eambbo meannu-motaid govvagalleriijas.
Girjjatgávttiid earuhit
Váccán festiválabáikkis ja geahčan daid oallut gávttehasaid.
Márkomeannus leat oallugat geat atnet gávtti, dahje eará sámi biktasiid, ovdamearkka dihte luhka.
Váccán ovtta nieidda lusa, ja jearan in go oaččo govvet su.
– Maid, áiggut mu govvet? Oba somá, ja vel go dá lea vuosttaš gákti maid ieš lean gorron, lohka Eli Karianne Vesterheim Hætta.
Son lea nu movttet. Sus lea čuvgesalit girjjatgákti alde. Sihkarvuođa dihte jearan makkár guovllu gákti lea.
– Dat lea hui váttis earuhit girjjatgávttiid, muhto mus gal leat nu olu silbbat badjelis ahte olbmot eai eahpit ge ahte lean Guovdageaidnulaš, reašká son.
Iežas čiŋadanmálle
Juohkehaččas lea iežas málle movt čiŋada, muhtun ii giesa vuoddagiid, muhto sistebátti mas lávggastagat leat gitta.
Muhtimiin leat boalloboahkánat, ja earáin fas čuolddaboahkánat.
Girjjatgáktái ii dárbbaš liinni, ja ii vissa leat agis adnon liidni dasa, go lea leamaš gákti maid ruovttus geavaha. Liidni gal de lea ovddas go bargat galgá.
Dan oaidná maid dál eará gávttehasain, hui oallugat eai ane liinni, muhto dušše riskkuiguin ságget gákteoza.
Muhtimiin lea ulloliidni olggiid badjel, ja riskkuiguin sággan gitta.
Converse-skuovat
Lea čielggas ahte go festiválii čiŋada gávttiin, de oažžu veaháš dáčča motamáilmmis viežžat osiid.
Oallugiin leat ovdamearkka dihte Converse skuovat alde, mat leat hui bivnnuhat dáčča motamáilmmis, áibbas dábálaš skuovat.
– Mun coggen converse-skuovaid go mu mielas orro bieksut nu lossadat, jus nu heive lohkat. Mu mielas leat converse-skuovat hui fiidnát ja heivejit geasset, lohka Marit Inger Pulk.
Ođđamállet gárvvut
Váikko Márkomeannus leat oallugat čiŋadan gávttiin, de leat maid oallugat geain ii leat gákti badjelis.
Muhtimiin leat ođđamállet gárvvut, main lea sámi hápmi, ovdamearkka dihte vuolpu mas lea holbi.
Earát fas leat gorron gáktelágan čuvllaid.
Olbmot dustet geahččaladdat iešguđetlágan hámiid, ja das oaidná ge ahte duodji eallá.
Gávttit leat buot lágan ivnniin, ja dávjá lieđđehearvvagat. Sáhttá guvgesrukses ivdni, sáhttá ránes ivdni.
Eai leat guokte gárvvu ovttalágana, ja duojárat leat vissásit álgán dál juo boahtte doaluide hutkat ođđa čiŋaid.
