Politiijat eai bala buollima leavvamis.
Finnmárkku politiijat dieđiha Twitteris diibmu 13:45 ahte lea buollin Buolbmágis, Deanus.
110-guovddáža operašuvdnajođiheaddji Jarleif Sørensen muitala iFinnmarkui ahte buollin lea campinga lahka.
– Politiijat leat sajis ja buollinčáskadeaddjit leat jođus. Buollin lea campinga lahka Buolbmágis, dadjá son iFinnmarkui.
Eai dieđe vuos sihkkarit movt lea buollán, čállá iFinnmark.
– Eai leat olu muorat lahkosis, muhto leat muhtun rissit doppe.
Politiija dieđiha ahte eai bala buollima leavvamis viesuide mat leat lahkosis.
