Árja lea ceggen listtu Deanu gieldaválgii ja listtu sátnejođiheaddjievttohas Hartvik Hansen, guhte lea hárjánan politihkkár, lea ilus go nagodii čohkket eambbo go doarvái namaid listtuid.
Árja lea ceggen listtu Deanu gieldaválgii ja listtu sátnejođiheaddjievttohas Hartvik Hansen, guhte lea hárjánan politihkkár, lea ilus go nagodii čohkket eambbo go doarvái namaid listtuid.
– Lea vuosttaš háve go leat Árjja namas Deanu gieldaválggas, mii lea historjjálaš. Ii lean beare cegget, vuosttažettiin fertiimet čoaggit unnimusat 50 nama ovdal go sáhtiimet cegget listtu, mii manai hui bures. Lean giitevaš go olbmot dorjjot Árjja, lohká Hansen.
Váldoášši
Hartvik Hansen muitala Árjja váldoášši leat meahcásteapmi ja geavaheapmi.
– Dálá hástalus lea ahte meahcásteapmi lea áitojuvvon, erenomážit sin dáfus geat geavahit luonddu ovddešvuggii mielde. Oainnán dárbbu dákkár listui mii vuoruha erenomáš meahcásteami, lohká Hansen ja lasiha ahte gielapolitihkka lea maid dehálaš ášši.
– Seailluhit ja bisuhit sámegiela nu bures go vejolaš lea dehálaš dálá servodagas, dadjá son.
Árjja prográmma ii leat vel čielgan, muhto Hartvik Hansen lohká Árjja vuođđoulbmil galgá leat oassin sin prográmmas.
Árjjas beaktu
Hartvik Hansen lea dán áigodagas ovddastan Oktasašlisttu Deanu gieldastivrras, ja lea gieldda dálá várresátnejođiheaddji. Son doaivu Oktasašlistu jienasteaddjit čuovvolit Árjja.
– Mun jáhkán mis lea doaivu vuoitit válgga. Jus geahčasta maŋemuš sámediggeválgii, de leimmet stuorra vuoitit. Lea miellagiddevaš ja čájeha ahte Árjjas lea beaktu, ja mus leat dieđusge jáhkku ahte mii oažžut ollu jienasteddjiid vai sáhttit váikkuhit politihka, lohká son.
Hástaleaddji ja gearggus
Hansen lohká iežas gearggusin sátnejođiheaddji ámmáhii go lea searvan válgii, ja lea dálá sátnejođiheaddji hástaleaddji.
– Lean dieđusge gearggus, muhto boađus boahtá das mo jienasteaddjit háliidit, lohká son.
Hansen lohká iežas dán áigodagas geahččalan goazastit opmodatvearu nu ahte ii galgga lassánit, ja leamašan guovddážis mielde biehttaleamen máksimis sáhku man Norgga stáhta ovddidii Deanu gildii.
– Stáhta lea váidán ja sáhkkohan gieldda go eat lean čuvvon mohtorjohtolatlága, sáhku sturrodat lei golbma čuohteduháha. Stáhta ii duostan diggot Deanu gielddain, mii lea okta ovdamearka meahcástanáššiin maid lean ožžon čađa dán áigodagas, lohká son.
Ášši almmuhuvvui vuosttaš geardde 17.04.2015
