Hans Ole Eira čuoččuha ahte Guovdageainnu meahcástanlávdegoddi lea doallan čoahkkima gos meannudedje vuodjinlobiid, nu ahte eai leat buohkaid gohččon ge čoahkkimii.
Hans Ole Eira čuoččuha ahte Guovdageainnu meahcástanlávdegoddi lea doallan čoahkkima gos meannudedje vuodjinlobiid, nu ahte eai leat buohkaid gohččon ge čoahkkimii.
Hans Ole Eira (Johttisápmelaččaid listu) čuoččuha ahte ii leat ožžon sisagohččuma meahcástanlávdegoddečoahkkimii gos lávdegoddi meannudii vuodjinlobiid. Eira moaitá meahcástanlávdegotti čálli Isak Mathis O. Hætta go ii leat dieđihan buot lávdegoddeáirasiidda čoahkkima birra. Eira lohká čoahkkima dollon nu ahte son ii diehtán ge dan birra.
Soaittáhagas gulai čoahkkima birra
Čoahkkin galggai ovddit bearjadaga, guovvamánu 5. beaivvi, ja Eira lei vuolgán čoahkkimii. Vihtta minuhta ovdal go čoahkkin galggai álgit, maŋiduvvui čoahkkin fáhkka. Dasto son gulahalai meahcástanlávdegotti čálliin, Isak Mathis O. Hættain, gii lea Guovdageainnu suohkana luondduhálddašeami doaimmaheaddji. Eira lohká ožžon Hættas dieđu ahte ferte dieđihit goas sutnje heive doallat fas čoahkkima.
– Mun čállen dieđu bearjadaga ahte munnje heive disdaga, muhto in gullan šat maide. Disdatiđida soaittáhagas deiven Isak Mathis O. Hætta márkanis, ja sus gullen ahte čoahkkin lei juo leamaš mánnodaga. In lean ožžon dieđu ge, muitala Eira.
Meahcástanlávdegottis leat ge golbma miellahtu, jođiheaddji Per Nils Saari (Bargiidbellodat), nubbijođiheaddji Inga Maybritt Bongo (Johttisápmelaččaid listu) ja lávdegoddelahttu Vegard Olsen (Guovdageainnu dáloniid listu).
Hans Ole Eira lea Inga Maybritt Bongo várrelahttu, ja soai leigga šiehttan ahte Eira manná dán čoahkkimii. Inga Maybritt Bongo ii loga diehtit maide čoahkkima birra earret go ahte maŋiduvvui, ii leat son ge ožžon čoahkkingohččuma.
Oidnen SMS easka maŋŋil
Isak Mathis O. Hætta lohká ožžon dieđu Eiras, mas son muitala goas sutnje heivešii doallat čoahkkima.
– Hans Ole Eira čálii SMS-dieđu munnje ahte sutnje heive disdaga doallat čoahkkima. Mun oidnen SMS-dieđu easka maŋŋil čoahkkima mii lei mánnodaga, ja danne in vástidan su dieđu.
– Lea lávdegotti jođiheaddji gii mearrida doallá go čoahkkima vaikko eai leat buohkat doppe. Bearjadaga, go maŋiduvvui čoahkkin, mun šihtten Eirain ahte čoahkkin dollo mánnodaga diibmu logis. Moai ean soaitte gulahallan.
Nu olu ohcamat, fertii meannudit
Meahcástanlávdegotti jođiheaddji Per Nils Saari lohká ahte sis lei čoahkkin, ja čoahkkimis sii meannudedje olles guba vuodjinlohpeohcamiid.
– Ovddit bearjadaga ii šaddan čoahkkin go mun fertejin vuolgit, heahtedáhpáhusa dihte. Mu dieđu mielde oaččui Hans Ole Eira njálmmálaččat dieđu ahte čoahkkin maŋiduvvo mánnodahkii, lohká Saari.
Per Nils Saari joatká muitalit ahte ledje boahtán birrasii 100 dispaohcama ja dan dihte šadde doamahallat meannudit ohcamiid. Suohkanis maid lohket sádden olu dispareivviid dán vahkku.
– Ledje nu olu ohcamat ahte čoahkkin fertii dollot, vaikko buohkat eai lean boahtán. Dasa lassin ii leat gáibádus ahte buohkat galget čoahkkimis, muhto ahte eanetlohku lea, ja moai leimme guovttis, muitala Saari.
– Ii leat dohkálaš
Eira mielas lea heittot go ná geavvá ja diehtá ahte lea ovdal ná geavvan. Ii loga gal háliidit árvádallat manne ná lea geavvan.
– In dieđe manne ii leat gohččon čoahkkimii, muhto dát ii leat goit dohkálaš. Sisagohččun galgá boahtit čálalaččat, ean ge leat goabbá ge Inga Maybritt Bongoin ožžon dan. Jus fal lávdegotti jođiheaddji lea addán dieđu čállái, de lea čálli bargu sáddet sisagohččuma. Ii leat dohkálaš ahte suohkanbargi ii bargga iežas barggu. Dan ferte lávdegotti jođiheaddji čorget.
– Ná ii galgga goit ovddasguvlui, loahpaha Eira.
