Mohtorsihkkellihkohisvuođaid logut leat mealgat geahppánan diimmá geasi rájes. – Dat čájeha ahte lea ávki vuoruhit johtolatsihkarvuođa, muhto lea vuos menddo árrat dan barggu ložžet, lohká NAF MC.
– Mii leat hui ilus go jápminlihkohisvuođat mohtorsihkkeliiguin (MC) leat geahppánan. Dat čájeha ahte leamaš ávki vuoruhit johtolatsihkarvuođa, guoddokampánjaid ja buot buori barggu mii dahkko beaivválaččat MC-sihkarvuođa ektui, buktá buriid bohtosiid, lohká Norges Automobil Forbund (NAF) MC jođiheaddji, Jan Harry Svendsen preassadieđáhusas.
Son muittuha ahte dan barggu ii sáhte bissehit go lea dehálaš doallat muittus, ii oktage galggašii johtolagas jápmit dahje garrasit roasmmehuvvat ja dat gusto mohtorsihkkelvuddjiide maid.
– Mii eat galgga vajáldahttit ahte suoidnemánu loahpas jápme ovcci olbmo mohtorsihkkellihkohisvuođas ja dat lea ovcci menddo olu, lohká Svendsen.
MC-sihkarvuođabarggus ovttasbarget logi organisašuvnna, sihke mohtorsihkkelgávppit, mohtorsearvvit, Trygg Trafikk, Nord universitehta, johtolatskuvllaid suorggit, Stáhta geaidnodoaimmahat ja NAF MC.
Svendsen muitala lei stuorra beroštupmi NAF sihkarvuođa sáttatvuodjimii árrageasi mas oassálastit ohppe mo sáhttet lasihit iežaset sihkarvuođa go vudjet mohtorsihkkeliin.
