Bearjadaga diibmu 12:s dánsot mánát badjel 1100 skuvllas BlimE-dánssa oktanas NRK Superis. Máze skuvla lea okta dain skuvllain geat soitet oidnostit dalle.
Bearjadaga diibmu 12:s dánsot mánát badjel 1100 skuvllas BlimE-dánssa oktanas NRK Superis. Máze skuvla lea okta dain skuvllain geat soitet oidnostit dalle.
Oahpaheaddji Lise Bakkeby Lillemoen Máze skuvllas dat árvalii ahte sin skuvla maid searvvašii NRK Supera kampánjii.
Son muitala iežas gullan dán birra ovdal ja go oinnii dán jagáš fáttá de jurddašii ahte dát heive juste sidjiide.
– Fáddá lea ahte olmmoš galgá beassat leat nu mo lea ja mun jurddašin ahte dát heive midjiide Máze skuvllas. Min oahppit gullet dakkár birrasiid mii ii leat nu dábálaš muđuid riikkas, lohká oahpaheaddji.
Lassin Máze skuvlii leat maiddái eará sámi suohkaniid skuvllat searvan dása, nu mo Deanu Montessoriskuvla, Deanušaldi skuvla ja Snåasen skuvla.
Eai dieđe oidnojit go TV:s
Oahppit de hárjehallagohte dánsut ja loahpa loahpas dieđihedje vel kampánjii.
– Ohppiin orro leamaš hui somá, sii leat hirbmadit áŋgiruššan ja duos dás jearralit galgat go hárjehallat. Sii maid ieža leat evttohan mo sáhttet dahkat vai besset mielde TV-sáddagii, čilge Bakkeby Lillemoen.
Skuvllat geat leat dieđihan kampánja leat sádden videoid NRK:ii, gos dánsot BlimE-lávlagii, NRK ges vállje geaid čájehit bearjadaga sáddagis mii sáddejuvvo diibmu 12:s.
– Mii eat dieđe leat go beassan mielde, muhto oahppit ledje gávttiid coggan nu ahte lea gal erenoamáš video, lohká oahpaheaddji.
Nannen oktavuođaid
BlimE lea NRK Supera ustitvuođakampánja, ja dovdosátni lea «Si hei, vær en venn, BlimE!» mii sámegillii lea «Loga hei, lea ge ustit, searvva!»
– Go fokusere oktasaš ulbmila birra ja rumašlaččat ja musihkalaččat ovttasbargá, de dat sáhttá nannet oktavuođa, hálddašandovddu ja searvevuođa. Mii sávvat dát lea dakkár dáhpáhus mii inspirere, lohká prošeaktajođiheaddji Maria Grande.
Máze skuvlla oahpaheaddji duođašta prošeavtta nannen oktavuođaid ohppiid gaskkas:
– Mun oainnán ahte oahppit leat buorebut oahpásnuvvan ohppiiguin geat eai leat seamma ceahkis, dan in jáhke ahte ledje dahkat dán kampánja haga, muitala Lise Bakkeby Lillemoen
Áigot inspireret mánáid
Dán jagáš BlimE-lávlaga leat gohčodan «Kom igjen ‘a» ja dan lea Joakim H. Haukaas buvttadan ovttasráđiid Madcon joavkkuin, joavku dat lávluge lávlaga.
Teavstta ulbmil lea inspireret norgga mánáid árvasat searvevuhtii, go dohkkehit nuppiid earáláganvuođaid ja ohcet dan mii lea buorre alddis ja earáin.
Viđát geardde
Dát lea viđát jahki go NRK Super lágida BlimE-dánssa.
Dán jagi leat maid bovden mánáid čuojahit lávlaga fárrolaga Kringkastingsorkestera (KORK) čeahpes musihkkáriiguin.
Čakčabotta leat muhtin mánát beassan hárjehallat KORK:in, ja bearjadat eahkeda bovde NRK Super vuosttaš geardde BlimE-showii ja feastakonsertii iežaset gárdinis.
(Ášši joatká gova vuolábealde)
Govven: Geir Evensen/NRK
Mánát maid lávdái
Badjel 1000 máná leat bovdejuvvon konsertii, ja badjel 150 máná galget lávddi ala čuojahit Madconain ja Kringkastingsorkesteriin.
Dasa lassin boahtá earret eará Dina MGPjr:s, Jonas Flipp Klippas, Håkon ja Mikkel Julemorgen-prográmmas, Stian Newton-prográmmas ja stuorra musihkalaš válbi.
Daid mánáid gaskkas geat lávddi ala galget, lea okta korpsa Abildsøs eret, olles viđát ceahkki Ytre Enebakk skuvllas ja oktanuppelot rumbodearpi Høvikas ja Lieris eret.
Prográmmajođiheaddji lea Margrethe Røed.
Showa sáddejuvvo NRK1:s bearjadaga skábmamánu 11. beaivvi diibmu 18.15-18,46 ja NRK Superis diibmu 18.35-19.05. Oktasaš dánsun ges čájehuvvo árabus seamma beaivvi, diibmu 12.00:s.
