Falástallanpresideanta Tom Tvedt lei njuorasmuvvan maŋŋel go lei geahččan čájálmasa «Ingen er homo i 2. divisjon» Tromsø Arctic Pride rahpamis.
Norgga falástallanpresideanta Tom Tvedt lei vuolgán Alfheim Stadionii bearjadateahkeda go Tromsø Arctic Pride čájehii «Ingen er homo i 2. divisjon», man Andreas Koschinski Kvisgaard ja Carl Morten Amundsen leaba ráhkadan.
– Lea rievttes ja mávssolaš bargu! Dat heive nu bures deike, logai njuorasmuvvan falástallanpresideanta neavttáriidda ja lágideddjiide maŋŋel go lei geahččan čájálmasa. Čájálmas čájehuvvui Alfheim Stadiona kantiinnas.
Oažžut positiiva guottuid
Tom Tvedt rámidii neavttáriid Andreas Koschinski Kvisgaarda ja Peder Ulvena, ja logai diehttelassan ahte dakkár čájálmas čájehuvvo falástallannuoraide. Tvedt oaivvilda ahte dakkár dáiddálaš barggut leat veahkkin positiivvalaččat ráhkadit positiiva ja fátmmastahtti guottuid falástallamis.
Bihttá lea heivehuvvon njuolga nuoraide ja gieđahallá dan movt spábbačiekčamis lea leahkit homofiilan. Bearjadaga čájehuvvui bihttá guktii ja goappaš háve lei čájálmaslatnja dievva.
– Mávssolaš čájálmas
«Ingen er homo i 2. divisjon» lea oassin Girjávuohtafestiválas, ja festiválahoavda lea duhtavaš go čájehit dakkár čájálmasaid main homofiiliija ja homofobiija leat fáddán.
– Mii diehtit ahte falástallamis lea leamaš homofobiija. Mun lean goitge oba sihkar ahte dakkár čájálmasaid vehkiin go dát, mas lea nu čielga diehtu, lea mihá álkit oažžut positiiva guottuid. Dát lea mávssolaš čájálmas ja lea hervvošanveara go Romssa falástallan lágida dan iežaset ruovttušiljus, lohká Girjáivuohtafestivála festiválahoavda Stein Sebastian Fredriksen.
Girjáivuohtafestivála álgá ge ihttin, mánnodaga.
