Son galledii olgobáikki Hámmárfeasttas ja válddii girdi ruoktut.
– Mii leat dál ožžon duođaštusa ahte Troandimis lea oktii njommon, gii lea galledan Hámmárfeastta. Son galledii Brygga Mathus golgotmánu 8. beaivvi. Sus galgá leamaš njuolggo oktavuohta golmmain olbmuin Hámmárfeasttas ja golmmain olbmuin Troandimis. FHI váldá njoammunguorrama sis girdis geaiguin olmmoš lea johtán máttás. Positiiva bealli das lea ahte mis lea oppalašgeahčču Brygga Mathusas gos okta njoammun lea jo duođaštuvvon ovddežis, dadjá Hámmárfeastta sátnejođiheaddji Marianne Sivertsen Næss digitála preassasáddaga bokte.
Porsáŋgui
Dasa lassin son buvttii ovdan ahte guovtti olbmos lea maŋimuš beaivvi duođaštuvvon korona. Nubbi gullá Hámmárfestii ja nubbi fas gullá Porsáŋggu gildii. Goappašagain lea čanasteapmi buohcceviesu njoammunguorramii.
– Mis lea oktavuohta Porsáŋggu gieldda doaktáriin dál, dadjá Sivertsen Næss.
Divusta
Guovtti maŋimuš beaivvis leat guokte ođđa positiiva njoammunduođaštusat boahtán. Dán rádjái leat 200 iskosa čađahuvvon. 100 dain leat leamaš negatiivvat. Gielddalaččat leat 68:s erremis, ja Finnmárkku buohcceviesus leat 89:s erremis, dadjá Sivertsen Næss.
– Ii leat riekta ahte 120 buohcceviessobargi leat erremis nu go boahtá ovdan medias, dadjá Næss.
Loga maid: Buohcceviesus 120 bargi erremis: – Dál leat hearkkes ja váttis dilis
Isket buohkaid
Son maid muitala ahte buot buohcceviesu bargit dál iskojuvvojit. Maiddái sii geat eai leat leamaš njuolggooktavuođas njommojuvvon olbmuiguin, dahje eai leat symptomat.
Giddejit doavtterkantuvrra
Gieldda ássit, geaidda lea njommon, sirdašuvvet ja šaddet gieldda divššu vuollái. Dat čuohcá álbmoga dearvvašvuođabálvalussii, muitalii Sivertsen Næss.
– Olu resurssat mannet dasa dál. Mii leat maid mearridan doavtterkantuvrra aktivitehta unnidit, vai gáhttet sin geat leat riskajoavkkus. Dás rájes šaddá elektrovnnalaš doavtterdiibmu. Ii oktage oaččo galledit kantuvrra earret jus lea šiehtaduvvon, dadjá Næss.
Gaska
Hámmárfeastta gielda lea maid mearridan ahte olbmuin galgá guokte mehtera gaska.
