– Min gielda lea ovdavázzigielda eará gielddaide mat áigot ovddidit sámi perspektiivva ja áimmahuššat sámi beroštumiid buori vuogi mielde, lohká ráđi jođiheaddji, Mariann Wollmann Magga.
Mátta-Várjjaga gielddastivra mearridii diibmá ásahit gildii Sámi Ráđi.
Lei Bargiidbellodat (BB) mii evttohii dan 2017 bušeahttašiehtadallamiid oktavuođas, ja ožžo doarjaga evttohussii Guovddášbellodagas ja Sosialisttalaš Gurutbellodagas.
Mannan vahkkus lei ráđis vuosttaš čoahkkin.
Čoahkkimis buvttii gieldda sátnejođiheaddji, Rune Rafaelsen (BB), dearvvuođaid ja deattuhii ahte sámi historjá lea dehálaš oassi guovllu oktasaš historjjás.
– Ovdavázzit eará gielddaide
Mátta-Várjjat Sámi Ráđi jođiheaddji Mariann Wollmann Magga (BB) lea movttet go Mátta-Várjjaga gildii lea ásahuvvon dakkár ráđđi gieldda dásis mii galgá gozihit sámi áššiid.
– Min gielda lea ovdavázzigielda eará gielddaide mat áigot ovddidit sámi perspektiivva ja áimmahuššat sámi beroštumiid buori vuogi mielde, lohká Magga preassadieđáhusas.
Čielga vuoruheamit
Mátta-Várjjat Sámi Ráđis leat juo čielga jurdagat maid áigot vuoruhit.
Kultuvra ja duodjeárbevieruid seailluheapmi, giellaoahpahus, gelbbolašvuođalokten gieldda dásis ja doalahit buriid prošeavttaid mat leat juo jođus.
Mátta-Várjjat Sámi Ráđđi galgá leat ráđđeaddi orgána gildii áššiin mat gusket sámiide dahje main leat váikkuhusat sámiide.
Ráđis leat jođiheaddji ja nubbejođiheaddji geaid gielddastivra lea nammadan, ja golbma olbmo geat ovddastit organisašuvnnaid ja servviid.