Geassebileahtta galgá čohkket olles regiovnna geasset. Geassemánu 1. beaivvi rájes lea vejolaš ovttain bileahtain mátkkoštit nu olu go ollet, sihke bussiin ja fatnasiin.
Geassebileahtta bistá čieža beaivvi dan rájes go oasttát, ja máksá 990 ruvnnu ollesolbmuide ja 495 ruvnnu mánáide ja sidjiide geat ožžot hálbbiduvvon bileahtaid. Geassebileahta sáhtát oastit gaskkal geassemánu 1. beaivvi ja borgemánu 24. beaivvi.
– Geassebileahtta mii bistá čieža beaivvi addá friddja mátkkošteami buot bussiiguin ja fatnasiiguin mat doaimmahuvvojit Tromssa fylkajohtolagas ja Snelandias. Fearga lea juo nuvttá sidjiide geat mátkkoštit biilla haga, dadjá fylkkaráđđi Kristina Hansen (Bb) preassadieđáhusas.
