SAS lea mearridan ahte mátkkálaččat šaddet geavahit njálbmesuoji sin girdiin.
Vuossárgga rájes šaddet SAS girdimátkkošteaddjit geavahit njálbmesuoji go johtet Norggas ja Skandinavias.
Girdifitnodat dieđiha preassadieđáhusa bokte ahte mátkkálaččain galgá medisiinnalaš njálbmesuodji fárus ja ahte dát galgá geavahuvvot girdis, čállá TV2.
Ovdalaččas leamaš bággu geavahit njálbmesuoji go mátkkošta olgoriikii SAS fárus.
– Skandinavia eiseválddit leat ávžžuhišgoahtán olbmuid geavahit njálbmesuoji, danin ásaha SAS dán njoammuneastadandoaimma, dieđiha fitnodat preassadieđáhusas.
