Sámi allaskuvla beassá álggahit oahpaheddjiidoahpuid masterprográmmaid čavčča rájes, jus oliha vel vissis eavttuid.
Sámi allaskuvla beassá álggahit oahpaheddjiidoahpuid masterprográmmaid čavčča rájes, jus oliha vel vissis eavttuid.
NOKUT (Našunála orgána oahpahuskvalitehtii) lea dál ovddalgihtii dohkkehan Sámi allaskuvlla viđa jagi oahpaheddjiidoahpuid masteriid vissis eavttuiguin.
– Dát lea máilmmi somás ja dehálaš sáhka olles Sápmái. Mun lean hui movttet go min bargit nu čehpet ja gierdevaččat leat lihkostuvvan dáinna proseassain, lohká Sámi allaskuvlla rektor Gunvor Guttorm.
Eavttut
Sámi allaskuvla lea dássážii fállan njeallje jagi oahpaheddjiidoahpuid, muhto dál gáibiduvvo viđa jagi masteroahppu, man NOKUT ferte dohkkehit ovdal go oahput sáhttet álggahuvvot.
NOKUT lea dál dohkkehan ahte Sámi allaskuvla beassá daid álggahit, muhto bidjá vissis eavttuid.
Eaktuduvvo earret eará ahte Sámi allaskuvla virgáda professor II matematihkas, suomagielas ja ruoŧagielas, ovdalgo formálalaččat addá loahpalaš dohkkeheami.
Sámi allaskuvla lea soahpamin fágaolbmuiguin geat sáhttet váldit namuhuvvon virggiid ja árvvoštallá ahte sii bohtet sadjái farggamusat.
Fertejit doarvái ohccit vel
Dan geažil Sámi allaskuvla bidjá johtui sámi oahpaheddjiidoahpu 1.-7. ceahki mastergráda ja 5.-10. ceahki mastergráda 2017 čavčča rájes.
Eaktuduvvo gal vel ahte leat doarvái ohccit geat devdet unnimusgáibádusaid.
– Dál sávan beare ahte oažžut eanemus lági mielde ohcciid. Sápmi dárbbaša ođđa oahppan oahpaheddjiid, sávvá Guttorm vel.
Oahput leat ain ohcan ládje Sámi allaskuvlla báikkálaš sisaváldima bokte gitta miessemánu 31. beaivvi rádjái.
