Álttá dievddut masse vejolašvuođa čiekčat 1. divišuvnnas boahtte jagi.
Alta IF dievdojoavkkus (2. divišuvnnas) ledje guokte čuoggá eambbo go Raufossas ja Askeris ovdal mannan vahkkoloahpa ja áigodaga maŋemus čiekčamiid.
Sis lei maid buoremus vejolašvuohta beassat čiekčat kvalifiserenčiekčama.
Eai nagodan
Álttáin ii mannan nu go hárjeheaddji, Rune Repvik, lei vuordán.
Sii vuoittáhalle 0-1 ruovttušiljus Skeidii, ja Raufoss fas vuittii 3-2, mii mearkkaša ahte sii gorgŋo nuppi sadjái. Asker maid vuittii. Alta IF njiejai danne njealját sadjái PostNord-ligas (1. ossodat) dán jagi.
HamKam vuittii ja besset alit dássái, Raufoss beassá čiekčat kvalifiserenčiekčama, ja Asker šattai goalmmádin.
– Dieđusge lea hui vahát dat. Mii leat birgen bures dán áigodaga, ja mis lei buorre vejolašvuohta nagodit kvalifiserema. De lea vel váivvit go eat dan dihte nagodan dan, dadjá Alta IF hárjeheaddji Rune Repvik A-sportenii.
