Seastinbáŋku 1 Davvi-Norga lea vuovdán buot ossosiid ruoššalaš báŋkus North West 1 Alliance Bank, ja dan geažil eai leat šat Seastinbáŋkus doaimmat Ruoššas.
Seastinbáŋku 1 Davvi-Norga lea vuovdán buot ossosiid ruoššalaš báŋkus North West 1 Alliance Bank, ja dan geažil eai leat šat Seastinbáŋkus doaimmat Ruoššas.
Davvi-Norgga Seastinbáŋku1 searvvai 2008is Ruošša báŋkomárkaniidda. Mihttu lei čuovvut Davvi-Norgga fitnodagaid main leat doaimmat Ruošša bealde. Go ođđa strategiija ja jođiheapmi doaibmagođii 2013is, de mearridii Davvi-Norgga Seastinbáŋku1 heaittihit doaimmaid Ruoššas. Dál go North-West 1 Alliance Bank lea vuvdon, de eai leat Seastinbáŋku 1 Davvi-Norggas šat doaimmat báhcán Ruošša bealde.
– Seastinbáŋku 1 Davvi-Norgga deháleamos váldodoaimmat leat fállat buori báŋkofálaldaga olbmuide ja fitnodagaide Davvi-Norggas. Dat lea min váldoulbmil. Ja dan sivas lea ge Davvi-Norgga Seastinbáŋku1 vuovdán buot ossosiid ruošša báŋkus, muitala konsearnahoavda Jan-Frode Janson Davvi-Norgga Seastinbáŋkku1s.
Váttis vuovdit
Ruošša ekonomiija vásihii juovlamánus 2014s duođalaš heađi mii čuzii hejot Ruošša báŋkodoibmii. Dalle massii Davvi-Norgga Seastinbáŋku1 300 milliuvnna ruvnno dan ruošša doaimmain. Lei bealli dan supmis maid báŋku lea golahan Ruošša doaimmaide.
– Ollu internašunála báŋkkut leat 2015s vuovdán eret ossosiid báŋkomárkaniin Ruoššas ja leat stuorrát táhpen das. Dat heajos ovdáneapmi Ruošša ekonomiijas dagahii vuovdima váttisin. Dan dihte leat mii dál duhtavaččat go dál vuovdit eret min oasi Ruoššas ja eat šat masse eanet ruđa, muitala konsearnadirektevra Petter Høiseth.
Davvi Norgga báŋku deháleamos
– Báŋkodoaimmaheapmi Ruoššas gáibidii ollu návccaid. Dál áigut bidjat buot návccaid leat buorre báŋkun min davvi norgga báŋkokundariidda, loahpaha konsearnahoavda Jan-Frode Janson.
