Oktiibuot 74 studeantta leat ožžon stipeandda, ja Sámediggi lea máksán oktiibuot 1 498 500 ruvnno.
Sámedikki alitoahpahusa stipeanda 2022 čakčii lea dál gárvásit meannuduvvon. Oktiibuot 74 studeantta leat ožžon stipeandda.
Oahpaheaddjeoahpuid studeanttaide lei ohcanáigemearri Sámedikki stipendii golggotmánu 1. beaivi.
Sámediggeráđđi Mikkel Eskil Mikkelsen (NSR) lea hui duhtavaš dainna go stipeandameannudeapmi lea mannan dan mutto jođánit, ja sávvá dan movttiidahttit studeanttaid ođđajagi guvlui dahkat buori barggu.
– Sámi servodagas lea stuora dárbu sihke mánáidgárdeoahpaheddjiide ja oahpaheddjiide geain lea giella- ja kulturgelbbolašvuohta geat sáhttet oahpahit vuođđo- ja joatkkaskuvllas. Sávan dan dihte ahte olu eanet studeanttat válljejit oahpaheaddjeoahpuid boahtteáiggis, dadjá Mikkelsen.
