Norgga universitehtain ja allaskuvllain leat masá 300 bargi vásihan seksuálalaš loavkašuhttima ja 18 bargi dadjet ahte leat seksuálalaččat illastuvvon maŋimuš jagi.
Ođđa guorahallamis leat kárten givssideami, vealaheami ja seksuálalaš loavkašuhttima Norgga universitehtaid ja allaskuvllaid bargobirrasiin.
299 bargi muitalit ahte leat seksuálalaččat loavkašuvvan ja 12 bargi ges muitalit ahte leat seksuálalaččat illastuvvon maŋimuš jagi.
– Dat lea áibbas dohkketmeahttun ja čájeha ahte universitehtat ja allaskuvllat fertejit vel buorebut eastadit vealaheami, dadjá dutkan- ja alit oahpu ministtar Iselin Nybø preassadieđáhusas.
Šállošahtti
Buot Norgga universitehtat ja allaskuvllat bovdejuvvojedje searvat guorahallamii mii čađahuvvui mannan giđa.
17 984 bargi 26 oahppoinstitušuvnnas serve guorahallamii ja dát lea ge birrasii 43 proseantta universitehta- ja allaskuvlabargiin.
– Guorahallama bohtosat leat hirbmat duođalaččat ja mii šállošat sakka go nu olu bargit leat šaddan vásihit givssideami, vealaheami ja seksuálalaš loavkašuhttima. Dát geatnegahttá min joatkit eastadanbargguiguin mat gusket guottuide, kultuvrraide ja etihkkii, dadjá Universitehtaid- ja allaskuvllaidráđi stivrajođiheaddji Dag Rune Olsen.
(©NTB)
