-Almmuhus-
KULTUVRAMárkomeannu lea ráhkadan festiválavuola

Márkomeannu lea ráhkadan festiválavuola

Journalista

-

-

«Vuolla» galgá festiválagussiid muittuhit márkosámi geasi. Márkomeanu jođiheaddji doaivu ahte olbmot liikojit vullii.

Márkomeannu lea olu jagiid háliidan ráhkadit festiválii sierra vuola. Dál lea áigumuš šaddan duohtan, go dán jagi guossihit festiválagussiide «Vuolla» nammasaš juhkamuša vuosttaš gearddi.

 – Lea erenomáš kula go min festiválas lea sierra vuolla. In leat gullan ovdal sierra Sámi festiválavuola birra. Dán áigge lea hui bivnnut vuoššat vuola ja livččii somá jus eará festiválat čuovvolit min, dadjá Márkomeanu festiválajođiheaddji Marita Kristin Eilertsen.

Geassevuolla

Vuollagis lea olu máistu ja lea ráhkaduvvon humbil rásis. Leat festiválabargit geat leat leamaš mielde hutkamin vuollaga.

 – Mii leat ráhkadan geassevuola, das galgá leat suoidnesmáhkka mii muittuha márkosámi geasi. Mun in leat vel máistán vuola, muhto illudan dan dahkat ovdal festivála. Mun galggan máistit ja dohkkehit dan, čilge Eilertsen.

Jáhkká olbmuid liikot vullii

Vuola fitne dušše oastit Márkomeanu festiválas, ja álgo jagi leat buvttadan 500 bohtala festiválagussiid várás.

 – Mun jáhkkán olbmuid liikot vullii hui bures ja doaivvun ahte dán dat jearahit báras, loahpaha festiválajođiheaddji Marita Kristin Eilertsen.

Márkosámi buvtta

Báikkálaš vuollabuvttadeaddji vuoššá vuola Márkomeanu ovddas. Skavli Brygghus jođiheaddji, Liss-Mari Kanebog muitala ahte son álggos guossohii moadde vuollašlája festiválabargiide. Sii muitaledje de mii lea buorre ja mii lea heitot, ja dáinna lágiin ovttasbarge dassážii go geahččalanpanela lei duhtavaš.

 – Vuollaráhkadanneava lea áibbas erenomáš. Vuolla lea dábálaš rihča ja sáhttá gohčoduvvot geassevuollan mas lea olu máistu mii galgá muittuhit luonddu, dadjá son.

Persovnnalaš vuolla

Kanebog lea jođihan vuollavuoššahaga badjel guokte jagi Evenskierris. Son muitala iežaset geavahan jagi buvttadit Márkomeanu vuola.

 – Lea stuora erohus industriija vuolas ja vuollagis mii buvttaduvvo smávva vuoššahagas. Vuollagis lea eanet máistu ja vuolla šaddá eanet persovnnalaš. Márkomeanu vuolla lea mu mielas njálgga, ja dasa leat geavahan doarvái guhkes áiggi gávdnat dan buoremus máisttu. Dál lean bargagoahtán ođđa hástalusain, muhtin oahpis lea hástalan mu ráhkadit vuola mii heive bohccobirgui. Dáinna gal livččii suohtas lihkostuvvat, lohká Skavli Brygghus oamasteaddji Liss-Mari Kanebog.

Márkomeannu lágiduvvo suoidnemánu 23.-25. beaivái Gállogiettis Romssa ja Nordlándda fylkkarájás.

-Almmuhus-