Ávvira sáddagis lei vejolaš gullat luođi mii diibmá nammaduvvui Sámi álbmotluohtin.
Áillohačča dahje Nils Aslak Valkeapää luohti «Sámi eatnan duoddariid» válljejuvvui Sámi álbmotluohtin sámiid 22. konferánssas Jielleváris borgemánus diibmá.
Luođi šuoŋa ja dajahusaid lea bidjan Áillohaš-rohkki. Luođi originála giella lea davvisámegiella, muhto dat lea jorgaluvvon lulli-, julev-, anáraš-, nuortalaš- ja gielddasámegielaide. Luohti jorgaluvvo boahttevuođas maiddái eará sámegielaide. Dál álggahuvvo rivttiid sirdinproseassa Áillohačča maŋisbohttiin Sámiráđđái, mii galgá oamastit luođi sámi álbmoga bealis. Oamasteami bokte Sámiráđđi suodjala luođi unohis dahje lobihis geavaheamis.
Ávvira sáddagis Sámi álbmotbeaivvi, juoiggai Juoiganjiena-vuoiti Marit Ravna Anti dan ja videos vuollelis beasat ođđasit geahččat su.
Sáddagis muitalii son maiddái mo lea vásihan dramáhtalaš áiggi maŋŋel go diibmá vuittii dán ođđa juoigangilvvu.
Sara Risten Susanna Gaup
