Virgái ledje viđas ohcan ja čielggai dalán ahte Marija Griniuk lea son gii deavdá virgegáibádusaid buoremusat.
Sámi Dáiddaguovddáš ovttadat (SDG) stivra lea virgádan 38-jahkásaš Marija Griniuk ođđa direktevran mearreáigevirgái njealji jahkái, Sámi Dáiddaguovddážii.
Nu čállá Sámi Dáiddaguovddáš preassadieđáhusas.
– Marija Griniuk lea Litauenis eret ja sus lea ukrainalaš duogáš. Son lea ássan moanaid jagiid Københámmanis, Dánmárkkus. Griniuk hállá guhtta giela, dánska-, litauen- , ukraina-, eŋgelas-, ruošša- ja polskagiela. Sus lea nana dáiddafágalaš máhtolašvuohta ja viiddis bargohárjáneapmi jođiheames, kurateremis, gaskkusteamis, ekonomiijas ja márkanfievrrideamis, čállet sii.
Marija Griniuk bargá dutkin ja loahpaha dál doavttergráda Árktalaš dáidda ja hábmen-fakultehtas Roavvenjárgga Universitehtas. Griniuk lea álggahan ja buvttadan máŋggaid stuorra dáiddaprošeavttaid Litauenis ja Dánmárkkus. Son lea maiddái oassálastán prošeavttain Davvikalohtas/Sámis.
– Son bargá sihke visuáladáiddárin, dutkin, kuráhtorin ja jođiheaddjin dáiddasuorggis ja danin leat sus buorit vásáhusat buot surggiin main SDG boahttevaš direktevrras dárbbašuvvojit.Marija Griniuk fárre bearrašiinnis Kárášjohkii ja álgá bargui suoidnemánu 25. beaivvi, čállet sii.
