Beaivváš Sámi Našunálateahtera ođđa stivrrajođiheaddjin šattai Maria Utsi 2020-2024 áigodahkii.
Maria Utsi šattai Beaivváš Sámi Našunálateahtera ođđa stivrrajođiheaddji go sámediggeráđđi nammadii stivrralahtuid ja várrelahtuid váldočoahkkimis mii dollojuvvui mánnodaga geassemánu 15. beaivvi.
– Illudahttá sakka go Maria Utsi lea váldán luohttámušdoaimma stuorámus sámi kulturásahusa stivrrajođiheaddjin, dadjá sámediggeráđđi Henrik Olsen (NSR) preassadieđáhusas.
Ođđa teahtervistti
Sámediggeráđđi vuordá oažžut Utsi ja eará stivrralahtuid mielde prosessii ođđa teáhtervistti realiserema guvlui, mii oktii lokaliserejuvvo Sámi joatkkaskuvla ja boazodoalloskuvllain, ja viidáseappot nationála sámi teáhtera ovddideamis.
– Bargu ođđa teáhtervistti ja dilli dáláš lokálaid ektui lea leamaš muhtumin gáibideaddji. Maŋimuš áiggis leat teáhteris leamaš hástalusat koronadili geažil. Muhto teáhteris lea maiddái leamaš áigodat goas lea vuoitán bálkkašumiid ja lea ožžon dohkkejumi iežas dáiddalaš doaimmas, ja prošeakta ođđa teáhtervisttiin oaččui gieskat stáhtabušeahta evttohusas 6 miljovnna ruvnno prošekterema álggaheapmái, dadjá Olsen.
– Háliidat giitit
Ođđa stivrrajođiheaddji várrelahttun lea Máret Ánne Sara. Stivrralahtut dán áigodagas leat Gisle Stenersen, Inger Elin Utsi ja Asta Balto, ja várrelahtut fas Ole Henrik Bjørkmo Lifjell, Ada Einmo Jurgensen ja Ken Are Bongo. Sámediggeráđđi giitá ovddeš stivrrajođiheaddji barggus ovddas.
Sámediggeráđđi háliida seammás giitit Lene Hansena barggu ovddas maid lea dahkan stivrrajođiheaddjin gávcci jagi, čállet preassadieđáhusas.
