Norgga artista Maria Arredondo galgá dán čavčča Davvi-Norggas gierdomátkái, gos lávlu girkuin. Guovdageainnu girkui gal ii leat buresboahtin lávlut, go ii lávllo aivve sálmmaid.
Norgga artista Maria Arredondo galgá dán čavčča Davvi-Norggas gierdomátkái, gos lávlu girkuin. Guovdageainnu girkui gal ii leat buresboahtin lávlut, go ii lávllo aivve sálmmaid.
– Maria Arredondo ja Torstein Sødal eaba leat goassige leamaš Finnmárkkus, ja illudeaba boahtit davás. Soai doallaba oktiibuot 18 konsearta, eanaš konsearttaid girkuin, ja háliidivččiimet Guovdageainnus maid girkus doallat konseartta. Maria Arredondo galgá konsearttain lávlut risttalaš lávlagiid, viissaid ja gospel lávlagiid, muitala «Artistguiden», dahje Artisttagaskkusteapmi fitnodat guhte ovddasta Arredondo, beaivválaš jođiheaddji Bjørn Terje Bråthen bokte.
Sádden ohcamuša girkui
Konsearta lea 29. beaivvi čakčamánus ja Bråthen lohká gullan ahte soaitá váttis beassat konsearta doallat girkus Guovdageainnus.
– Mii leatge sádden searvegotteráđđái ohcamuša, ja sávvat ahte dohkkehuvvo. Mii leimmet maid gulaskuddan Báktehárji valáštallanhállas doallat konsearta, muhto dat šattai beare stuoris. Jus ii meinestuvvo girkus, de leat goitge várren saji LES- viesus Guovdageainnus, lohká son.
Ii oro dárbu girku luoikat
Guovdageainnu searvegotteráđi nubbinjođiheaddji Risten Turi Aleksandersen muitala sii leat meannudan Arredondo ohcamuša, ja sii leat biehttalan ohcamuša.
– Nu guhka go ii leat girkokonsearta mas leat dušše sálmmat ja vuoiŋŋalaš lávlagat, muhto maiddái earálágan lávlagat, de ii orron min mielas dárbu girku luoikat dan konsertii. Mii leatge evttohan Arredondoi ahte mis leat eará heivvolaš báikkit Guovdageainnus gos sáhttá doallat konsearta, lohká Turi Aleksandersen.
Báikkálaš koara fárus
Arredondo lea bovden báikkálaš koaraid mielde báikkiin gos doallá konsearttaid. Guovdageainnu koara, Dimitri joavku lea bovdejuvvon leahkit mielde konseartas. Koara jođiheaddji Ellen Marit Sofie Mienna lohká šaddat gelddolažžan, ja maiddái hástaleaddji.
– Dat gáibiduvvo mis ahte mis leat fárus gaskkal 15 ja 20 lávlu. Mii leat leamaš maŋemus áiggiid miellahttulohku nuo ja ná, ja mii fertet oažžut eanet miellahtuid. Mii leat ožžon njeallje lávlaga maid ferte hárjehallat ja oahppat bajiloaivvi. Mii galgat maid guokte bihttá sierra ovdanbuktit , muitala Mienna.
