Davvi-Norgga Feastariemut almmuhedje ođđa konseartta boahtte jagáš festiválii – Mari Boine musihkkajoavkkuin, olles 14 jagi maŋŋel konseartta maid son doalai dán festiválas.
Feastariepmodirektevra Ragnheiður Skúladóttir lea ilus go beassá ovdanbuktit ovtta dain stuorámus sámi ikoniin min áiggis.
– Mii illudat vásihit Mari Boine musihkalaš máilmmii – ii ge leat veadjemeahttun ahte dán konsearttas beassá gullat ođđa lávlagiid. Son ovdanbuktá dakkár musihka masa guldaleaddjit duođas liikojit, ja Davvi-Norgga Feastariemuide boahtá son olles musihkkajoavkkuin, dadjá Skúladóttir.