Bearjadaga čoahkkanit girječállioahpu oahppit vuosttaš geardde, dan oktavuođas doallá sámenásti priváhtakonseartta sidjiide.
Bearjadaga čoahkkanit girječállioahpu oahppit vuosttaš geardde, dan oktavuođas doallá sámenásti priváhtakonseartta sidjiide.
Logi oahppi álget Sámedikki, Sámi Girječálliid Searvvi ja Sámi Dáiddárráđi oktasaš girječálliohppui ja ohppiin lea vuosttas oktasaš deaivvadeapmi 26.- 28. beivviid geassemánus Álttás. Dát vuosttas deaivvadeapmi álggaha guovttejahkásaš girječállioahpu, man váldoulbmilin lea oažžut nuoraide eanet girjjálašvuođa sámegillii.
Bearjadahkii 26.6 girječállioahppu lea ráhkadan erenoamáš prográmma, mainna háliidit movttiidahttit iežas ohppiid. Mari Boine searvá girječállioahpu rahpamii ja doallá ohppiide ja bovdejuvvon gussiide priváhta konseartta, muitala girječállioahpu prošeaktajođiheaddji Piia Susanna Juuso.
Buktá movtta
– Mii leat hui movttegat go Mari Boine háliida doarjut min prošeavtta ja atnit stuorra gudnin ahte juste son oassálastá rahpamii. Dát lea hui buorre álgu min ohppui ja Mari Boine gal lea inspirašuvdna ja ovdagovva midjiide buohkaide ja sihkkarit maiddái min ohppiide. Mari Boine čájeha iežas ovdamearkkain gosa olmmoš sáhttá beassat čehppodagain ja viššalvuođain ja dán jurdaga mii háliidit ovddidit iežamet ohppiide, muitala girječállioahpu prošeaktajođiheaddji Piia Susanna Juuso preassadieđáhusastis.
Almmustahttit girjjiid nuoraide sámegillii
Girječállioahppu ulbmil lea almmustahttit eanet girjjálašvuođa sámegillii ja erenoamážit nuoraide, geaidda eai leat almmustuvvan nu ollu girjjit sámegillii.
Oahppu galggašii loktet boahttevaš girječálliid gealbbu girjjálašvuođas ja čállimis vai boahtteáiggis sis lea buoret vejolašvuohta čállit giehtačállosiid ja bargat girječállin.
– Juste dákkáraš girječállioahppu ii leat leamaš ovdal mas oahppit ožžot oahpahusa ja juohke oahppi oažžu vel sierra bagadalli gii veahkeha su giehtačállosa hábmemis. Oahpus ii oaččo oahppočuoggáid, muhto oahppit ožžot oahpahusa ja bagadallama gárvet iežaset giehtačállosiid, maid sii galget gárvet oahpu áigge, muitala Juuso.
