Árktalaš Kulturguovddáš Hámmerfeasttas bovde Sámi álbmotbeaivvi doaluide.
Guovvamánu 5. beaivvi lea Beaivváš Sámi Nationálateáhter gávpogis, ođđa teahterbihtáin «Bohtos dál dat beana».
Hámmerfeastta girjerájus ja Hámmerfeastta Árktalaš Kulturguovddáš ovttasbarget ja lágidit ávvudeami girjerádjosis, guovvamánu 6. beaivvi.
Sii čállet preassadieđáhusas ahte háliidit bidjat sámi giela, girjjálašvuođa ja historjjá eambbo oidnosii. Dan dihte girjerádjosis skeŋkejit sámegiela girjjálašvuođa gussiide.
Girjerádjosis lea maid sámi vahkku mas fuomášuhttit sámi girjjálašvuođa ja bidjet sámegielgirjjiid oidnosii.
Olu dáhpáhusat
Muđui lea olu mii dáhpáhuvvá Hámmerfeasttas. Earret eará lea pop-up restauránta gos guossuhuvvo sámi biebmu. Kafea mas beassá gáfestallat ja herskostallat.
Maŋŋelgaskabeaivvi ges lea nuvttá kino, de čájehuvvo sámegielfilbma «Olbmot, rievvárat ja Kardemomme-gávpot». Sámediggeráđđi Hans Ole Eira ja Hámmerfeastta sátnejođiheaddji Terje Wikstrøm doallaba sáhkavuoru.
Hámmerfeasttas beassá maid vásihit kultuvrralaš oasi, Mari Boine joavkkuin guoimmuhit lávddis. Konsertii šaddá oastit bileahtaid.
