-Almmuhus-
-Almmuhus-
KULTUVRAMari Boine BeskánLuossaRockii

Mari Boine BeskánLuossaRockii

-

-

Beskenjárgga gilážis Kárášjogas bovdejit dál nuppes festiválii, ja leat hui rámis go leat ožžon Mari Boine dohko.

Beskenjárgga gilážis Kárášjogas bovdejit dál nuppes festiválii.

 – Dán vuoru boahtá Sámi ja Kárášjoga stuorámus násti min lusa. Mari Boine boahtá ruoktot iežas čáppa musihkain mii lea dego sivdniduvvon birrasiidda gos galgá lávlut. Lea stuora gudni min festiválii oažžut Mari deike, ja mii illudit. Dát šaddá historjjálaš ja buorre. 

Nu dadjá festivála buvttadeaddji Runar Green preassadieđus.

 


LUOSAT JA DOLOŠ NÁSTTIT: Runar Green muitala ahte sii álge diibmá lágidit festivála gos galgá luossabivdu, luohti ja ođđa áigásaš musihkka guovddážis. Vuorkágovva: Nils Johan Vars.

 

 

Luossa dehálaš

Green muitala ahte sii álge diibmá lágidit festivála doppe vai ožžot gillái doaimmaid ja deaivvadanbáikki buot buolvvaide. Doppe galgá luossabivdu, árbevierut, luohti ja ođđa áigásaš musihkka leat guovddážis. Festivála jurdda álggii dainna go muhtimat geat gullet Beskenjárgii háliidedje dohko ásahit juoidá. Nu šattai ge festivála mas lea luossa ja sámi rocka guovddážis.

Beaivet leage luossabivdogilvu buohkaide ja vehá guoimmuheapmi lávddis. Eahkes ges luohti ja musihkka,  ja lea sámi rocka birra sáhka. 

 

Ollu násttit doppe vuolgán

Green muitala ahte dán gilážis leat boahtán ollu buorit juoigit, nugo Biret Elle, Piera Balto, Johan Anders Bær ja maid Anders Johnsen, gii juoiggai juo lávddis 1960-logus Festspillene i Nord-Norge -doaluin.

 – Mii háliidit gudnejahttit dáid láidesteddjiid ja vel buktit oidnosii ođđa vugiid mat čuožžilit sámi musihkas, dan rájes go musihkka heivehuvvui luohtái ja dan rájes go dohkkegođii lávlut sámegillii.

 

Releasekonsearta

Piera Balto lea dál ráhkadahtten CD skearru iežas “Piera juoiga”- skearrus man dagai 1978:s. Son dat álggaha ge olles eahkeda iežas release-konsearttain.

Kai Somby ja sii geat álggus ásahedje Intrigue joavkku, leat dál KaraRockers, ja sii čuojahit 70-logu coverlávlagiid. Amund Johnskareng oktan joavkkuin čuojaha maid iežas dovddus lávlagiid, nugo “Sámi politihkkár” ja “Dårlig dárogiella”. Sii geat juiget, leat Per Tor Turi, John Máhtte Utsi, Frank Balto, Berit Alette Mienna ja dán jagáš SGP-vuoiti Johan Anders Bær.

 

-Almmuhus-