Margaret Berger ja Elle Márjá Eira galgaba guoimmuhit Lávdi Finnmárkku doaluin Finnmarksløpet oktavuođas.
Margaret Berger ja Elle Márjá Eira galgaba guoimmuhit Lávdi Finnmárkku doaluin Finnmarksløpet oktavuođas.
– Lávdi Finnmárku leat rámis ovdanbuktit nanu konseartaprográmma mas Margaret Berger ja Elle Márjá Eira leaba njunnošis. Maiddái báikkálaš artisttaide lea čáhkkehuvvon sadji konsearttaide Finnmarksløpet máđija alde, čállá Lávdi Finnmárku, dahje Scene Finnmark preassadieđáhusastis.
Lávdi Finnmárku doallá «LiveScene», nu movt sis lea vierrun šaddan Finnmarksløpet doaluid oktavuođas, ja dál njukčamánus lea fas áigi sin nuvttá olgokonsearttaide.
Áigeguovdil
Margaret Berger lea hui áigeguovdil juste dál sihke «Hver gang vi møtes» TV2:iš, ja NRK-ráiddus «Muitte mu», mas gudnejahtii ja bijai luođi Anneli Dreckerii.
Berger beakkihii duođas go beasai «Idol» finálii 2004:s, ja maŋŋel lea ožžon ollu rámi iežas skearruid dihte, sihke Norggas ja olgoriikkas.
Jagi 2013 oassálasttii son «Eurovision Song Contest» gilvvus mas bođii njealját sadjái «I Feed You My Love» lávlagiin.
Almmuha vuosttaš skearru
Elle Márjá Eira lea áigá juo čájehan ahte lea okta Sámi ovddimus live-artisttain, ja lea dovddus iežas lagas ja persovnnalaš musihkain.
Su musihkalaš ovdanbuktin lea gaskal luođi, elektronika ja world music.
– Su stuora ja fámolaš, muhto seammás rašes jietna lea buktán sutnje ollu rámi sihke Norggas ja olgoriikkas. Son rámiduvvo iežas visuála ja iešlágan konsearttaid dihte, ja 2017 almmuhuvvo su vurdojuvvon vuosttaš skearru, čállet lágideaddjit.
LiveScene konsearttat čuvvot Finnmarksløpet ja dollojuvvot Deanus, Vuonnabađas, Girkonjárggas, Kárášjogas ja Álttás.
