Marit Hætta Øverli ja Klemet Anders Buljo ođđa musihkkavideo lea sudno iežaska birra.
Dán guovtti dovddus sámi artistta, dahje “Máret” nammasaš duo ođđa singel, lea almmuhuvvon mannan ija Youtube:s.
Geahča video dás vuollelis!
– Don gulat tittelis, “oahpes bálgát”. Dat mii lea mielde mánnávuođa rájes, čuovvu viidáseappot eallimis. Dat maid čájeha man rámis moai letne sámi duogážiin, muitala Klemet Anders Buljo.
“Feelgood” dovdu
Soai leaba ge Máret Hætta Øverliin juo lahka golbmalot jagi guoradan seamma bálgáid musihkkaovttasbarggus. Dál leaba gárveme olles skearru “Álo” mas dát lávlla lea okta dan gávcci lávlagis.
– Lea dakkár “feelgood” musihkka. Eai munnos leat váivvit ja suhtut maid bukte ovdan musihkas, dadjá Buljo.
Skearru lea leamaš gárvvis juo čakčamánus, muhto iešguđet sivaid geažil ii ilmma ovdal geassemánus. Ođđa skearruin galgaba giđđat juo Cubai turneret guokte vahku. Buljo lohká sudno galgat turneret muđui čavčča rájes gitta boahtte giđđii.
