Aktivisttat geat leat duorastaga rájes akšuneren Oljo- ja energiijadepartemeantta visttis leat mobiliseregoahtán stuorát akšuvnnaide ihttin iđđes.
Aktivisttat dieđihit ahte sii plánejit stuorát akšuvnnaid mánnodatiđida ja áigot giddet buot boahtima Oljo- ja energiijadepartemeanta departemeantavistái. Dán čállá Luondu ja Nuorat Facebook-siiddus.
Sii čállet vel ahte doppe lea maid vejolašvuohta čájehit doarjaga ja searvat lobálaš miellačájehemiide ja ávžžuhit olbmuid čájehit solidaritehta ja boahtit báikái.
Nuorra sámi aktivisttat NSR-N ja Luondu ja Nuorat leat dál leamaš badjel golbma jándora Oljo- ja energiijadepartemeantta váldosisaváldimis. Sii biehttalit guođđimis departemeantta ovdalgo ráđđehus lohpida Fovsen boazodoalloguovllus njeaidit bieggamilluid.
Mánnodatiđidii leat nuorra aktivisttat juo njeallje jándora akšuneren. Duorastatiđida lávkejedje birrasiid 15 aktivistta jearatkeahttá Oljo- ja energiijadepartemeantta lanjaide, demonstreret Fovsen bieggamilluid vuostá. Dalle lei juste 500 beaivvi áigi dan rájes go Norgga alimusriekti celkkii ahte bieggamillot Fovsenis rihkkot olmmošvuoigatvuođaid, ja Norgga stáhta ii leat vuos dahkan maidege bissehit dán rihkkuma.
