Gaskavahku deaivvada Sámediggi ja buot bellodagat Ruoŧa ráđđehusa boaittobealministariin Jennie Nilssoniin. Ovttas sii galget digaštallat mot boazodoalloláhka galgá heivehuvvot Girjás-dupmui.
Ruoŧa ráđđehus háliida maid evttohusas guorahallat buot sámiid Ruoŧa vuoigatvuođaid. Maiddái sámiid geat leat olggobealde čearuid.
Stefan Mikaelsson ovddasta SameÄtnama ja son lohká iežas imaštit ahte Ruoŧa ráđđehus bovde maid Ruoŧa organisašuvnnaid dan guorahallamii.
– Lea unohas go Ruoŧa ráđđehus bovde maid Ruoŧa organisašuvnnaid dan guorahallamii. Sidjiide ii gula dat ášši, čilge son Sámi Radioi ja SVT Sápmái.
Håkan Jonsson, gii ovddasta Guolástan- ja bivdosámiid bellodaga, illuda fas dan mearrádussii.
– Sii galget guorahallat maid guolástan- ja bivdorivttiid sámiide olggobealde čearuid ja dat leat olu min bellodaga váldogažaldat maid mii leat ovddidan, čilge son Sámi Radioi ja SVT Sápmái.
